Një atlete nga Uganda që jetonte në Kenia humb humbi jetën pasi u sulmua me benzinë dhe u dogj nga i dashuri i saj. Atletja olimpike Rebecca Cheptegei pësoi djegie të rëndë në trup dhe nuk mundi t’i mbijetojë plagëve.
Lajmin për ndarjen nga jeta të maratonistes e ka dhënë presidenti i Komitetit Olimpik të Ugandës.
“Ne kemi mësuar për vdekjen e trishtuar të atletes sonë olimpike Rebecca Cheptegei pas një sulmi të dhunshëm nga i dashuri i saj. U prehtë në paqe shpirti i saj dhe ne dënojmë me forcë dhunën ndaj grave”, deklaroi Donald Rukare në rrjetin social X.
Presidenti shprehu gjithashtu keqardhjen për një “akt frikacak dhe të pakuptimtë që çoi në humbjen e një sportisteje të madhe”.
Maratonistja 33-vjeçare nga Uganda, e cila garoi në Paris, kishte pësuar djegie të mëdha pas sulmit të së dielës, tha mjeku që e trajtonte.
