Mesditën e sotme është shënuar viktima e parë nga Koronavirusi në Shqipëri, një 73-vjeçare e cila qëndronte e shtruar në spitalin e Durrësit.
Pacientja ka qëndruar për disa ditë e paizoluar në spital, duke pasur kontakte direkte me personelin mjekësor, por edhe me pacientë të tjerë, të shtruar në dhomën e saj.
Kështu, janë marrë mostrat e mjekëve dhe infermierëve të Spitalit të Durrësit, duke iu kryer analizat për Koronavirusin.
Në një konferencë për mediat, ministrja Ogerta Manastirliu ka bërë publike rezultatet e analizave të personave të testuar, të cilët fatmirësisht kanë rezultuar të gjithë negativë ndaj Covid-19.
“Dua të njoftoj se të gjitha testimet, e mjekëve dhe infermierëve kanë rezultuar negative. Kjo do të thotë se mjekët dhe infermiert kanë punuar me udhëzimet e MSH dhe të OBSH-së”- u shpreh ministrja.
