Një vajzë e re ju shtua konkurrenteve të “Për’puthen” ditën e sotme. Ajo quhet Alvisa, ka studiuar në Fakultetin e Ekonomisë, por i pëlqen të merret me sport. Ajo është 25 vjeçe me origjinë nga Vlora dhe aktualisht menaxhon një biznes të saj.
Që në fillim ajo trazoi ujërat në program, sepse pjesa më e madhe e djemve të pranishëm i shprehën menjëherë pëlqimin. Po ashtu ajo zhvilloi një takim 4 minuta me Taulantin, që në fakt shkoi si mos më keq. Taulanti u shpreh shumë i emocionuar para Alvisës dhe nuk arriti të tregonte shumë nga vetja.
Me shumë mundim ata arritën të plotësonin 4 minutëshin e takimit dhe u dukën mjaft në siklet përballë njëri-tjetrit. Megjithatë në fund të takimit Taulanti i puthi dorën Alvisës dhe lanë mundësin për një takim tjetër pasi të çlirohen nga emocionet.
Ndërkohë ditën e djeshme në “Për’puthen” u prezantuan dy vajza të reja.
E para prej tyre ishte Ada 28 vjeçe. Ajo është me origjinë nga Skrapari dhe ka përfunduar Fakultetin e Mjekësisë. Ada ushtron profesionin e infermieres dhe e cilësoi veten si një femër ambicioze, që arrin gjithçka që dëshiron në jetë.
Konkurrentja tjetër ishte Mikela 26 vjeçe dhe dashuria e parë është qeni i saj me emrin Koko, e tashmë ajo shpreson të gjejë dashurinë e vërtetë në emision. Mikela shprehu lumturinë që është pjesë e programit dhe tha se dëshiron që të gjejë aty mashkullin ideal.
