Kushdo që ndjen se ka nevojë për një ndërhyrje në hundë, por ka frikë nga kirurgjia, tashmë e ka një zgjidhje. E kemi fjalën për ndërhyrjen jo kirurgjikale në hundë, e quajtur ndryshe si mbushës i hundës, që realizohet për 10-15 minuta maksimumi dhe ka efekt të njëjtë me atë të ndërhyrjes kirurgjikale.
Sipas WhatClinic.com, ky trajtim ka njohur një rritje me 26% vitin e fundit, duke bërë që ndërhyrjet kirurgjikale në hundë të ulen me 5%. Imagjinoni një hundë me kurriz të zvogëlohet pa dhimbje, për 10-15 minuta, të zgjasë 1 vit ose më shumë dhe më kryesorja, PA BISTURI. Me siguri tani po mendoni se zvogëlimi i hundës është gjëja më e thjeshtë.
Por çfarë është në thelb ndërhyrja jo kirurgjikale dhe kush është kandidati më i mirë për t’iu nënshtruar. A ka dhimbje dhe pasoja dhe a mund ta bëjë kushdo? Këto dhe të tjera pyetje ngjallën kureshtjen tonë, ndaj dhe “iconstyle.al” pyeti personalisht mjeken në departamentin e Kirurgjisë Plastike Rikonstruktive dhe Estetike në Spitalin Amerikan 2, Gera Tagani.
Më poshtë mund të lexoni gjithçka që duhet të dini për një ndërhyrje jo kirurgjikale në hundë para se të merrni vendimin final.
Çfarë është ndërhyrja jo kirurgjikale dhe si realizohet?
Ndërhyrja jo kirurgjikale e hundesë është mbushja me filler, Acid hialuronik, një material të cilin e përdorim për mbushje të pjesëve të ndryshme të fytyrës.
Acidi hialuronik injektohet me shumë kujdes për të drejtuar kurrizin e hundës, duke e injektuar në radiks, në mënyrë që hundët me kurriz duken të drejta.
Mbushja me filler (mbushës) në majë të hundës, e bën atë të duket më e hollë dhe me maja pak e ngritur. Gjithashtu mund të përdorim edhe “botulinum toxine” që është frenues për lëvizjen e muskulit nasal, i cili kur qeshim e ul majën e hundës për poshtë.
Pasi pacienti shtrihet, sterilizohet sipërfaqja, nëpërmjet një age të hollë injektojmë Acid hialuronik aty ku është e nevojshme, duke bërë kështu një punë të ngjashme me atë të skulptorit. Në përfundim të procedures jo-kirurgjikale të mbushjes së hundës, e cila zgjat 10-15 minuta, pacientit i jepen instruksionet e nevojshme dhe rezultatet që arrihen janë befasuese.
Cili është “kandidati” më i mirë për të realizuar një ndërhyrje jo kirurgjikale në hundë?
Dikush që ka një kurriz të theksuar. Duke mbushur kurrizin përreth mund të krijohet ideja e një hunde të drejtë. Në dukje njerëzit mendojnë që po i shtohet diçka hundës së tyre por në të vërtetë ajo thjesht do të duket më e e vogël duke u drejtuar.
Për ata që ende nuk e kanë një ide të qartë ose që nuk kanë vendosur mbi ndërhyrjen kirurgjikale të hundës, kjo metodë e përkohshme i ndihmon të qartësojnë idetë dhe vendimet e tyre. Kjo shërben për ta si një lloje prove paraprake.
Kush nuk duhet të bëjë ndërhyrje jo kirurgjikale?
Kjo si ndërhyrje nuk ka asnjë kontraindikacion mjekësor. Njerëzit që nuk mund të konsiderohen kandidatë janë ata të cilët kane një hundë shumë të madhe ose një kurriz ekstremisht të madh, hundë të thyer me probleme funksionale ose tepër të trashë në lëkurë (bulboze) dhe kjo ndërhyrje nuk i sjell përmirësim vizual. Për ta rekomandohet kirurgjia e hundës.
A ndjen dhimbje?
Mbushja që përdoret përmban përbërës anestezik lokalë, të cilët mundësojnë një procedurë komode, pa dhimbje dhe të shpejtë.
Kur duhet të zgjedhim mes një ndërhyrje jokirurgjikale dhe asaj kirurgjikale?
Procedurat jo kirurgjikale nuk kanë pothuajse asnjë rrezik, efekte anësore, dhe humbje kohe. Në fund përfitohen pothuajse të njëjtat rezultate. Metoda e re jo kirurgjikale e mbushjes se hundës do të thotë që ne mund të arrijmë rezultatin e dëshiruar brenda pak minutave dhe pa dhimbje. Ndërkohë që ndërhyrjet kirurgjikale ose rinoplastia kërkon rreth një muaj për rikuperim dhe rezultatet nuk janë gjithmonë perfekte.
Pra me Acidin hialuronik mund të arrihet:
-Rregullimi i asimetrisë së hundës
-Ngritja e majë së hundës
-Rregullimi i kurrizit të hundës etj.
A ka efekte anësore?
Disa nga efektet anësore megjithëse të rralla, mund të jenë skuqje, këputje, të vjella etj të cilat zgjidhen brenda pak ditëve. Hunda është një pjesë delikate e fytyrës dhe në terma më të qarta rankohet si pjesa më e rrezikshme e fytyrës,dhe kjo për arsye se furnizimi me gjak ne fytyre është shume i dobët, veçanërisht ne hundët qe i janë nënshtruar më parë ndërhyrjeve kirurgjikale. Pra kjo procedurë duhet kryer patjetër nga një mjek i specializuar me provojë!
Sa zgjat rezultati?
Meqenëse hunda është një organ statik dhe me pak lëvizje pjesore, rezultati mund të zgjasë nga 12 deri në 18 muaj dhe nëse trajtimi përsëritet mund të zgjasë më tepër.
