Ditën e sotme rreth orës 11:25 në fshatin Mborje të Korçës ndodhi një ngjarje tragjike që i mori jetën një 3-vjeçari. Sipas njoftimit të policisë teksa fëmija po luante i ra sipër një bombël e cila i shkaktoi vdekjen.
Fillimisht u fol se bëhej fjalë për një bombël gazi, por më pas në dëshminë që kanë dhënë familjarët është zbuluar se bëhej fjalë për një bombël oksigjeni.
Familjarët e vogëlushit të tronditur kanë treguar se në momentin e ngjarjes fëmija ishte në shtëpi së bashku me të ëmën dhe në një moment ai shkoi tek dhoma e gjyshit ku ndodhej edhe bombla, të cilën i moshuari e përdorte pasi vuante nga astma.
Mësohet se në momentin që fëmija e ka prekur bomblën, e cila ishte e përmasave të mëdha, ajo ka rrëshqitur duke e zënë poshtë 3-vjeçarin.
E ëma ka treguar se e ka parë të birin të mbuluar me gjak dhe e ka dërguar menjëherë në spitalin e Korçës, por fatkeqësisht ai nuk arriti të mbijetonte.
Burimi: Panorama
