Një djalë humbi unazën e propozimit, në shkallët e stadiumit ku po luhej ndeshja mes Yankees dhe Red Sox. Propozimi ishte planifikuar të shfaqej në ekranin qendror të stadiumit, dhe gjithë vëmendja e tifozëve u përqendrua tek ai, por ndodhi e papritura.
“Fillova të qaja, sepse mendova që e kisha humbur”, tha 29-vjeçari Andreë Fox nga New Castle, Pennsylvania. “Ndodhi shumë shpejt”, vijoi ai.
E dashura e tij, Heather Terwilliger nga Fredonia, New York, nuk kishte idenë më të vogël për atë që do të ndodhte në stadium. Andreë u ul në gjunjë, nxori kutinë e unazës, e hapi, por atje nuk kishte asgjë.
“Nuk e di se si reagova”, tha Terwilliger, pasi turma u shtang.
Të gjithë tifozët në pjesën e majtë të fushës ishin duke kërkuar për unazën, por askush nuk po e gjente. Minutat po kalonin dhe shpresa për ta gjetur, po fillonte të shuhej. Kur ndodhi mrekullia. Unaza kishte ishte ngecur në pjesën e përthyer të xhinseve të vajzës.
“Çdo minutë që po kalonte, thosha me vete: ‘O Zot, çfarë do të bëjmë nëse nuk e gjejmë?’”. Por si përfundim unaza u gjend dhe ajo sigurisht që tha “Po”.
