Skulptori i njohur Arben Bajo, 53 vjeç, e ka humbur betejën me COVID-19.
Lajmi i trishtë për vdekjen e tij është konfirmuar nga miqtë, një ditë pas thirrjes së dëshpëruar për gjak që kërkohej për skulptorin.
“Mëngjes i trishtë! Duararti Arben Bajo nuk ia doli dot, fitoi Covid-19! Paqe e përjetshme për ty mjeshtër!”, shkruan Arbër Kadia.
Bajo ka luftuar prej ditësh me COVID-19, por ditët e fundit gjendja e tij u bë më kritike. Ai ishte i intubuar në spitalin Infektiv.
53-vjeçari Arben Bajo, me profesion skulptor dhe pedagog tek Universiteti i Arteve, ka çelur disa ekspozita personale brenda edhe jashtë vendit.
Kolegët artistë si Ardian Isufi, Ilir Butka, Vladimir Myrtezai, Merita Selimi, Ilirian Shima dhe studentët e tij bënë apel përmes postimeve të rrjete sociale, se Bajo kishte nevojë urgjente për gjak të grupit A negativ, nga dikush që ka kaluar virusin.
“Iconstyle.al” ka theksuar prej kohësh rëndësinë e përdorimit të plazmës së gjakut të të shëruarve nga COVID-19. Kur një pacient injektohet me plazmën që përmban anti-trupa në formë serumi, pacienti mund të përfitojë mbrojtje shtesë imunitare (lexo këtu).
Është e nevojshme të niset menjëherë një fushatë për ndërgjegjësimin e njerëzve dhe të shëruarve nga virusi, që të ndihmojnë duke dhuruar gjakun e tyre, sa më parë. Ky shqetësim ngre edhe një herë nevojën që të veprohet sa më shpejt dhe jo kur gjendja e pacientit të rëndohet aq shumë saqë plazma të shihet si mundësia e fundit.
Studimet shkencore deri në këtë moment e konfirmojnë terapinë me plazmë, si një terapi të sigurtë dhe potencialisht të dobishme. Në këto kushte mbetet ende e paqartë se përse vendi ynë nuk po reagon sa është në kohë.
/Iconstyle.al
