Është ndarë nga jeta në moshën 66 vjeçare, aktorja e mirënjohur Hajrie Rondo. Ajo vuante prej kohësh nga një sëmundje e rëndë të cilën nuk e mposhti dot pavarësisht luftës së vazhdueshme.
Tani skenës shqiptare do t’i mungojë një tjetër yll i cili edhe pse u shua, do të vazhdojë të mbetet në mendjen dhe kujtimet e të gjithë dashamirësve të saj.
Hajrie Rondo njihet për rolet e shumta kinematografikë duke u bërë njëra nga aktoret e preferuara shqiptare dhe këtu do të veçonim filmin “ 14 vjeç dhëndërr” ku ajo u bë njësh me personazhin.
Aktorja e më shumë se 120 roleve, nga të cilët 40 në filma artistikë, doli për herë të fundit në skenë pak më shumë se një vit më parë në dramën “Tre Dhëndurët”.
Pikërisht pas interpretimit në këtë dramë, ajo u vlerësua nga kryebashkiaku i Tiranës me titullin “Mirënjohja e Qytetit”, në shenjë vlerësimi për kontributin e dhënë në film dhe teatër, duke u shndërruar në një model frymëzimi për brezat e rinj të aktorëve.
Ndër rolet e saj më të spikatura janë Donika Saro tek filmi “Një Vit i Gjatë”, Tana tek “Përrallë Nga e Kaluara”, Evanthia në filmin “Pesha e Kohës”, apo roli me Sejfulla Myftarin tek komedia “Gjithë Fajet i Ka Paraja”.
