Ditën e djeshme, qyteti i Durrësit u trondit për herë të dytë nga një ngjarje e njëjtë, pasi një shofer u pa rrugëve të qytetit duke tërhequr zvarrë një qen.
Kjo ishte një përsëritje e ngjarjes së shtatorit, autori i së cilës ndërroi jetë disa ditë më vonë.
Dje, shoferi i automjetit të tipit “Benz” me targa AC 179 T u fotografua duke tërhequr zvarrë qenin të cilin e kishte lidhur në pjesën e pasme të makinës.
Ky person ka arritur të identifikohet nga Polica e Durrësit e cila ka nisur hetimet, ndërsa ka marrë edhe dëshminë e tij në Komisariat.
Sipas uniformave blu, shoferi kishte deklaruar gjatë pyetjeve se kishte konstatuar kafshën (qenin), të ngordhur në rrugë, në afërsi të banesës ku jeton, (bazuar kjo dhe nga dëshmitë e personave të tjerë, banues në atë lagje) dhe e kishte marrë për ta spostuar pranë koshit të mbeturinave.
Njoftimi i policisë
Duke marrë shkas nga një foto e publikuar në rrjetet sociale, ku paraqitej një kafshë (qen), duke u tërhequr pas një makine, në Durrës, ju sqarojmë se:
Shërbimet e Komisariatit të Policisë Durrës, menjëherë identifikuan dhe shoqëruan në ambientet e Policisë, bashkë me mjetin e tij tip “Benz”, shtetasin H. H., 67 vjeç, banues në Durrës, i cili deklaroi se e kishte konstatuar kafshën (qenin), të ngordhur, në rrugë, në afërsi të banesës ku jeton, (bazuar kjo dhe nga dëshmitë e personave të tjerë, banues në atë lagje), dhe e kishte marrë për ta spostuar pranë koshit të mbeturinave.
Në vijim të veprimeve seksioni për Hetimin e Krimit në Komisariatin e Policisë Durrës, procedoi penalisht shtetasin H. H., për veprën penale “Keqtrajtimi i kafshëve”.
Materialet i kaluan Prokurorisë së Rrethit Gjyqësor Durrës, për veprime të mëtejshme.
Policia e Durrësit fton qytetarët të denoncojnë në numrin 112 dhe Komisariatin Dixhital çdo rast të paligjshmërisë në tërësi, duke ju garantuar anonimatin dhe reagim të shpejtë e të paanshëm.
