Kryeministri Edi Rama ka ndarë sot një përjetim personal në lidhje me tërmetin, gjatë vizitës së tij në familjen e Fatmir Gjanës në Durrës.
Ky i fundit humbi bashkëshorten, Xhuljetën, e cila kishte vrapuar për të dalë jashtë gjatë tërmetit të 26 nëntorit, por nuk mundi të shpëtonte.
Kreu i qeverisë tha se kur bie tërmet, nuk duhet të dalësh kurrë jashtë, pasi rrezikon më keq.
Ai rikujtoi një tërmet të fortë, që kishte rënë kur isht i vogël dhe sesi babai i tij, Kristaq Rama, i kishte shpëtuar së bashku me të vëllanë, Olsin, duke i mbajtur te dera.
Më tej, Rama tregoi se ka pasur marrëdhënie shumë të afërt me babanë e tij, ndërsa kujtoi se kur ka marrë vesh lajmin për vdekjen e tij nga Parisi, ka hequr mjekrën dhe vathin.
Biseda:
Rama: Nuk duhet të dalësh jashtë, kur bie tërmet. Ishim të vegjël kur ra një tërmet. Më kujtohet, Kristaqi i shkret më kapi mua dhe Olsin te dera.
Gjana: Ky ishte shumë i fortë dhe u këputën katet e para. Katër kate ranë si me rënë një kuti.
Rama i drejtohet djalit të Fatmirit: Më hoqe mallin e vathit tim. Kam pas vath edhe unë, e hoqa kur më vdiq babai, isha në Paris, dhe kishim shumë marrëdhënie të afërt, por unë do nisesha të nesërmen se nuk kishte avion, dhe kam ndenjur nga stresi nuk e di se sa orë, kam hequr mjekrën pa shkumë fare, hoqa vathin dhe u bëra si njeri normal, se më parë quhesha jo normal, dhe erdha për varrimin. Pastaj, ditën e varrimit u bëra ministër, ishte koiçidencë.
Gjana: Dje shkova në punë, më shikonin.
Rama: Duhet të bëhesh i fortë se ke fëmijë. Edhe djali do i bëjë së shpejti, sapo të zgjedhë, kur të zgjedhë, se mesa shoh ka shumë e s’di kë të zgjedhë.
/BalkanWeb
