Në qendrën kulturore të qytetit të Kavajës sot kishte zi dhe lot, ndërsa u mbajtën homazhet për gazetaren dhe moderatoren Adelajda Xhamani.
Gazetarja e njohur u nda nga jeta mëngjesin e së dielës në banesën e saj në Tiranë, ku gjendej e vetme.
Nga homazhet për Adelën, gazetaren e dashur që humbi jetën mëngjesin e djeshëm, këngëtarja Irma Libohova nuk i përmbajti dot lotët.
“Shpresoj që të përmbaj lotët deri në fund të kësaj fjale. Dje ishte e diel dhe ishte dita kur nusërohej. Adelën e kam njohur përmes miqve të përbashkët, dhe jemi bërë bashkë edhe në evente. Kam krijuar bindjen se ishte një vajzë me këmbë në tokë, po vdekja nuk paska radhë. Shpresoj që ajo të prehet në paqe, dhe nëna e saj të përballojë këtë ngjarje të kobshme”, u shpreh mes lotëve këngëtarja Libohova.
Mes dhimbjesh dhe lotësh, miq, kolegë dhe të afërm u mblodhën për t’i dhënë lamtumirën e fundit gazetares së njohur, e cila u nda nga jeta në kulmin e rinisë.
Në homazhe nuk mungoi as ish-partneri i saj Bjordi Mezini. Me kokën ulur i veshur me të zeza ish-banori i “Big Brother” fshinte lotët teksa ecte.
