Pas 27 vitesh debate arrihet marrëveshja me Greqinë për emrin e ri të Maqedonisë. Athina dhe Shkupi ranë dakord që nga dje ish-Republika Jugosllave të quhet Republika e Maqedonisë së Veriut.
Emri zyrtar i Maqedonisë deri më dje ishte ish-Republika Jugosllave e Maqedonisë (IRJM). Greqia e kishte kundërshtuar emrin Maqedoni, duke iu frikësuar pretendimeve territoriale për rajonin e saj të veriut.
Ajo kishte vënë veton ndaj ofertës së fqinjit për t’u bashkuar me NATO-n dhe Bashkimin Evropian. Emri i ri tani duhet të miratohet nga populli maqedonas dhe Parlamenti grek.
Pas marrjes së vendimit dy kryeministrat Aleksis Tsipras dhe Zoran Zaev dhanë një mesazh.
“Arritëm marrëveshjen me Zoran Zaev. Fqinjët tanë do të njihen nga 140 shtete si Republika e Maqedonisë së Veriut”, u shpreh Alexis Tsipras, kryeministri grek.
“Arritëm një marrëveshje historike me Greqinë. Kjo është një ditë e mirë për Maqedoninë. Me këtë marrëveshje kemi identitetin, gjuhën dhe kulturën tonë”, tha kryeministri maqedonas, Zoran Zaev.
