Xhudistja pejane Majlinda Kelmendi, ka shkruar historinë, duke siguruar medaljen e parë të artë olimpike për Kosovën, madje në pjesëmarrjen e parë të saj në Lojërat Olimpike për vitin 2016. Ajo u tregua dominuese ndaj konkurrenteve, duke i fituar raundet një e nga një, për të mposhtur në finale, italianen, Odette Giuffrida.
Kosovarja mundi në gjysmëfinale, japonezen Misato Nakamura, e cila më herët eliminoi në çerekfinale xhudisten ruse, Natalia Kuziutina. Fitorja e bujshme në gjysmëfinale e Kelmendit, erdhi pasi kosovarja mundi në çerekfinale kundërshtaren, Christianne Legentil, duke u kualifikuar. Legentil e kishte eliminuar më parë Kelmendin në Olimpiadën e Londrës në vitin 2012. Por fitorja e kosovares u pa qartë si një lloj hakmarrjeje që rezultoi me fitore.
Por me fat nuk ka qenë konkurrimi për notaren kosovare Rita Zeqiri, e cila e ka mbyllur dje aventurën e saj në Lojërat Olimpike Rio 2016. Pjesëmarrëse në garat e notit në stilin shpinë, në 100 metra, Zeqiri nuk mundi të kualifikohej. Ajo e mbylli garën me kohën 1:12:31, duke përfunduar prapa garueseve të tjera. Rita i bashkohet çiklistit Qëndrim Guri dhe qitëses Urata Rama, duke u bërë garuesja e tretë kosovare që eliminohet nga “Rio 2016”.
Ndërkohë, aventura e peshëngritëses shqiptare Evangjeli Veli, përfundoi me vendin e dytë në baterinë B në lojërat olimpike të Rio de Zhaneiros. Shtangistja, e cila garoi në peshën 53 kg ngriti në total 165 kg në dygarësh duke u renditur pas japonezes Kanae.
