Janë hapur zyrtarisht me një ceremoni madhështore Lojërat Olimpike të Rio De Zhanejros në Brazil. Një spektakël gjigand, u transmetua në qindra shtete të botës.
Me vetëm 6 sportistë, Shqipëria është prezantuar në Olimpiadën e Rios dhe delegacioni shqiptar ka parakaluar në pistën e stadiumit të “Marakana”-s. Ka qenë Luiza Gega, atletja shqiptare, e cila ka mbajtur edhe flamurin kuqezi gjatë ecjes në pistë. Shqipëria përfaqësohet me 6 sportistë, 2 në not, 2 në peshëngritje dhe 2 në atletikë.
Për herë të parë, pjesë e këtij parakalimi është bërë edhe Kosova. Në debutimin e saj në një Olimpiadë, shteti më i ri në Evropë lë prapa edhe Shqipërinë, duke u prezantuar me 8 sportistë.
Majlinda Kelmendi mbajti flamurin e Kosovës për herë të parë në histori në Lojërat Olimpike, në hapje të Rio 2016.
Ajo udhëhoqi parakalimin me mjaft krenari, duke bartur flamurin teksa shtatë sportistët tjerë dhe të tjerë antarë të delegacionit e ndoqën atë.
Në total, në Olimpiadë marrin pjesë 207 shtete, por për herë të parë këtë vit, shqiptarët po përfaqësohen nga dy shtete dhe 14 sportistë që pritet të japin maksimumin e tyre.
