Mbrëmjen e sotme një histori mjaft prekëse u transmetua në emisionin “Dua të të bëj të lumtur”, nën moderimin e Arbana Osmanit, ku personazhi kryesor ishte një vajzë nga Durrësi e cila prej vitesh kishte probleme në të ecur.
Fatkeqësisht, në fëmijëri, Dorina kishte kaluar një temperaturë të lartë që i kishte prekur muskujt e këmbëve.
Ajo madje me shumë sakrifica nga ana e prindërve të saj ka vazhduar edhe shkollën, kështu, për t’i falënderuar për gjithçka që ata kanë bërë për të, Dorina vendosi t’i ftonte në emisionin “Dua të të bëj të lumtur”, ku dhe i surprizoi me aktorin e njohur të humorit, Florjan Binaj. Ky i fundit u paraqit në rolin e policit të “Portokallisë”, Kol Frakushës.
Dorina u tha prindërve të saj:
“Ju solla këtu për t’ju falënderuar për çdo gjë që keni bërë për ne. Keni vuajtur dhe jeni lënduar shumë, por ia keni arritur sepse keni rritur tre fëmijë që ju duan shumë!”
Nga ana tjetër, Flori i emocionuar dhe i përlotur u shpreh:
“Ne shohim filma me superheronj, por heronjtë e vërtetë janë prindërit. Pasuria e vërtetë në jetë është familja dhe Dorina është një shembull për t’u marrë sepse njerëzit nuk janë ajo çfarë duket nga jashtë, por ajo që rrëzëllen nga brenda. Dorina është një vajzë me botë!”
