Mariglen Llapushi është nga Gramshi dhe që në një moshtë të vogël është i detyruar të përballet me shumë probleme.
Problemet e tij kanë nisur që para se të vinte në jetë, pasi i ati e kishte braktisur.
Kur nëna e tij ishte shtatzënë, i ati e kishte lënë pa pyetur asnjëherë për të birin, i cili tani është 14-vjeç.
Por, drama e jetës së tij u bë më e madh rreth dy javë më parë, kur ai humbi nënën e tij nga një sëmundje e rëndë.
Ajo vuante nga Leucemia dhe ndërroi jetë në një moshë të re, vetëm 42-vjeçe.
Tani Marigleni ka të gjithë peshën mbi supe. Ai jeton me gjyshen e tij të sëmurë në një shtëpi me qera dhe të gjitha duhet t’i bëjë i vetëm.
Për “Ballkanweb” 14-vjeçari ka treguar me zë të dridhur se tashmë përveç vdekjes së të ëmës, ka frikë mos mbetet në qiell të hapur pasi nuk ka para as të paguajë qeranë.
“S’më zë gjumi, kam frikë se më vjen qeraxhiu e më nxjerr jashtë, s’kam t’i paguaj ndërsa për të ngrënë më ka lënë pak ushqime mami”, thotë ai dhe fjalët të prekin zemrën.
Marigleni është në klasën e tetë, një nxënës me nota të mira, e për shkak të virusit COVID 19, mësimet është i detyruar t’i ndjekë online por në telefonin e tij s’ka ofertë dhe është i detyruar që të rrijë në dritare ku mundohet të marri wi-fi nga një familje aty pranë.
