Cilido qoftë motivi i një lufte, banorët e pafajshëm janë ata që e vuajnë, me jetën e tyre ose të njerëzve të tyre të zemrës.
Lufta Izrael-Palestinë deri tani nuk ka kursyer as fëmijë as të rritur si izraelitë edhe palestinezë. Cdo ditë e më shumë dalin në pah histori të dhimbshme.
Së fundmi një familje izraelite prej pesë anëtarësh u vra nga sulmet e Hamasit, trupat e të cilëve u gjetën në një përqafim tragjik. Aviv Kutz u gjet duke përqafuar gruan e tij, Livnat, vajzën, Rotem, dhe djemtë Yonatan, dhe Yiftach, teksa ishin të shtrirë pa jetë në një shtrat në shtëpinë e tyre në Kfar Aza.
Për të vazhduar me pasojat që sjell lufta, jeta e një çifti tjetër nga Kfar Aza u ndërpre pak para fejesës së tyre të planifikuar.
Zini kishte planifikuar t’i propozonte Ravivit më 10 tetor, por unaza që do t’i dhuronte asaj u gjet në shtëpinë e tyre të djegur.
Në të njëjtën mënyrë të pamëshirshme më shumë se 1000 fëmijë palestinezë në Gaza janë vrarë nga forcat izraelite që nga 7 tetori.
Që prej fillimit të sulmeve përllogaritet se forcat izraelite kanë vrarë një fëmijë palestinez përafërsisht çdo 15 minuta.
Përpos viktimave të shumta në numër edhe fëmijët palestinezë, të cilët deri më tani i kanë mbijetuar bombardimeve intensive të ushtrisë izraelite nëpër Rripin e Gazës, po vuajnë një krizë humanitare gjithnjë e më të rëndë, duke komplikuar traumat ekzistuese mendore dhe emocionale të pësuara nga 16 vjet rrethim dhe ofensiva ushtarake izraelite.
