Pak muaj më parë mbarë opinioni shqiptar u trondit nga vrasja në Shkodër e ish-efektivit të policisë Boran Bërçana dhe partneres së tij Silvana Ndoci. Çifti u ekzekutua duke u qëlluar me armë sapo ata kishin mbërritur para banesës së tyre ku prej kohësh jetonin me qera.
Gjatë kësaj kohe hetimet për zbardhjen e çështjes kanë vazhduar dhe së fundmi është zbuluar se ka qënë një thashethem i përhapur me qëllim futjen në sherr të bandave kriminale ai që ka çuar në ekzekutimin e Bërçanës dhe partneres së tij.
Pak ditë para ngjarjes në Shkodër ishte përhapur fjala sikur Boran Bërçana kishte deklaruar se kishte shtypur ai butonin e bombës ndaj Lul Kullës. Ky ishte një rast i rëndë ku tritoli që shpërtheu në qendër të qytetit të Shkodrës, shkaktoi panik e të plagosur mes kalimtarëve, ndërsa Lul Kulla u plagos rëndë.
Por sipas “ABC News” dhe hetimeve të fundit, Bërçana nuk e kishte thënë kurrë diçka të tillë dhe nuk kishte patur lidhje fare me ngjarjen e ndodhur. Pas verifikimeve ai ndodhej në Spanjë, për llogari të një grupi kriminal.
Megjithatë vendimi për vrasjen e tij ishte marrë, por bashkë me të do të vritej edhe bashkëjetuesja e tij, pasi cilësohej si person që kishte dijeni për shumë ngjarje.
Ata u qëlluan me 28 plumba, por fëmija që ishte me ta shpëtoi për mrekulli sepse ndodhej në sediljen e pasme të makinës.
Edhe pse ngjarja ka ndodhur që në korrik në pranga nuk është asnjë i arrestuar pasi në vendngjarje nuk është gjetur asnjë provë ligjore.
