Hetuesit indianë gjetën një nga dy kutitë e zeza të avionit ”Boeing 787” të ”Air India”, që u rrëzua të enjten në një zonë banimi të qytetit Ahmedabad, duke vrarë mbi 290 persona.
“Ekipet nga Autoriteti Indian i Aviacionit Civil kanë gjetur një kuti të zezë nga vendi i rrëzimit”, theksoi një zyrtar policie.
Një prej pasagjerëve të avionit me 242 vetë në bord, i mbijetoi mrekullisht rrëzimit të avionit që kishte për destinacion Londrën. Bishti i aeroplanit ishte ende i dukshëm, i ngulur në katin e dytë të një ndërtese.
Sipas raportit të policisë lokale, ekipet e shpëtimit kanë nxjerrë tashmë 265 trupa nga rrënojat e avionit dhe ndërtesave ku u përplas. Të paktën 24 vetë vdiqën në tokë kur aeroplani u rrëzua në mensën e një kolegji mjekësor.
Kryeministri indian Narendra Modi ka vizituar vendin e rrëzimit të aeroplanit dhe të plagosurit në spital.
Familjarët kanë dhënë mostra të ADN-së për të ndihmuar në identifikimin e viktimave.
Ekspertët e aviacionit thonë se është “pothuajse e pashpjegueshme” se si mbijetoi vetëm një pasagjer, pasi një aeroplan modern është projektuar t’u rezistojë përplasjeve dhe numri i të mbijetuarve duhet të ishte shumë i madh. Shkaku i rrëzimit ende nuk dihet.
India njoftoi një hetim zyrtar për rrëzimin e avionit në përputhje me protokollet ndërkombëtare. Përveç kësaj, qeveria po krijon një komitet të nivelit të lartë që përfshin ekspertë nga disa fusha për të shqyrtuar çështjen në detaje dhe do të punojë për të forcuar sigurinë e aviacionit dhe për të parandaluar incidente të tilla në të ardhmen.
