Ditën e hënë, “iconstyle.al” shkroi për herë të parë për nismën e jashtëzakonshme të Besar Lalikes dhe Eldian Cepeles
Eksperimenti i tyre i rrallë, mund të ndryshojë gjithçka për pacientët në gjendje të rëndë, pasi lejon që dy pacientë të trajtohen njëkohësisht në një ventilator të vetëm.
Ekperimenti i dy laborantëve rezultoi i suksesshëm dhe kjo do të thotë shumë për situatën e vështirë në të cilën ndodhemi.
Pasi ia dolën, ata kanë treguar se as që donin të përmendeshin për këtë gjest të tyre.
Besar Lalike i tha “BIRN” se i ishin futur punës pasi kishin parë printimet e kolegëve të tyre në Itali dhe kishin kuptuar se printerat që zotëronin në laboratorin e tyre mund ta kryenin procesin.
“Ne nuk donim që të përmendeshim fare për këtë punë. Nuk ishte qëllimi ynë që të bëheshim të famshëm,” tha Besari në një lidhje telefonike.
Lalike i tha se u ishte kërkuar që të prodhonin 300 pjesë për të dyfishuar kapacitetin e ventilatorëve ekzistues, edhe pse ende nuk ka emergjencë.
Më pas ai shtoi se nuk dëshiron të dalë në media dhe nuk zbuloi as sa para do të harxhojë së bashku me kolegun e tij për këtë proces.
“Nuk është qëllimi ynë të dalim në media. Ne e pamë këtë si zgjidhje në Itali dhe me ndihmën e personave të tjerë, që unë dua të përmenden, vendosëm ta bëjmë edhe në Shqipëri”, tha Lalike.
Kjo nisë erdhi në momentin kur Shqipëria kishte në dispozicion një numër të ulët ventilatorësh, prej150-200 copë dhe bashkë me porositë e reja.
Shembuj të ngjashëm për t’u ardhur në ndihmë mjekëve në ditë të vështira ka edhe në drejtime të tjera. Geri Çuçi, një sipërmarrës fason i dhuroi Ministrisë së Shëndetësisë 47 kostume të posaçme për mjekët.
Çuçi i tha “BIRN” se i ishte gjendur copë e përshtatshme për të prodhuar veshje që mund të dezinfektohen dhe lahen dhe kishte vendosur t’i bënte kostume për mjekët.
“Nga kjo [epidemia] duhet të dalim të gjithë bashkë, po s’dolëm të gjithë bashkë prej kësaj, marrim fund të gjithë. O dalim të gjithë, o mbarojmë të gjithë,” përfundoi ai.
Burimi: Reporter.al
