Ditën e sotme, nxënësit e shkollës “Janaq Kilica” në Fier janë helmuar sërish.
Sipas të dhënave paraprake, në vendin e ngjarjes kanë mbërritur 6 ambulanca dhe nxënësit janë dërguar me urgjencë në spital.
Shkaku i helmimit nuk është zbardhur ende, megjithatë policia ka bërë të ditur pistën e parë të hetimit.
Në njoftimin e policisë thuhet se helmimi ka ardhur si pasojë e një sprajti piperi nga një nxënës i kësaj shkolle.
Policia Fier/Informacion paraprak
Sot rreth orës 11:10, në spitalin Rajonal Fier kanë shkuar për kontroll mjekësor disa nxënës të një shkolle të mesme që kanë pasur probleme me frymëmarrjen.
Menjëherë në vendngjarje kanë shkuar shërbimet e Policisë dhe grupi hetimor dhe nga veprimet e para të kryera në bashkëpunim të ngushtë me Prokurorinë Fier, Drejtorinë Arsimore dhe Drejtorinë e Shkollës, paraprakisht dyshohet se është përdorur sprajt piperi nga një nxënës i kësaj shkolle.
Grupi hetimor nën drejtimin e Prokurorisë vijon veprimet për të zbardhjen e plotë të kësaj ngjarje.
