Ditën e sotme, disa nxënës të gjimnazit “Janaq Kilica” në Fier u helmuan sërish dhe u dërguan me urgjencë në spital.
Sipas policisë, një nxënës me inicialet A.D është i dyshuar për përhapjen e sprajit me piper.
Kur është pyetur për ngjarjen, nxënësi është shprehur se e kishte bërë për shaka, ndërsa Prokuroria e Fierit është ende në hetim për të mësuar shkaqet e përhapjes së lëndës helmuese.
Ministria e Shëndetësisë ka bërë të ditur se në spital janë paraqitur 50 nxënës, ndërsa aktualisht 42 prej tyre po qëndrojnë ende për t’u mjekuar.
Reagimi i Ministrisë
Ministria e Shëndetësisë dhe Mbrojtjes Sociale po ndjek me vëmendje situatën shëndetësore në Fier, ku një grup nxënësit të shkollës së mesme “Janaq Kilica” janë paraqitur me shenja intoksikacioni në spitalin rajonal të Fierit.
Spitali Rajonal Fier bën me dije se 42 nxënës po marrin trajtim në këtë spital dhe gjendja e tyre shëndetësore është e stabilizuar.
8 prej tyre kanë lënë spitalin pasi kanë marrë ndihmën e nevojshme mjekësore, ndërsa pjesa tjetër po monitorohet në vazhdimësi, por mjekët konfirmojnë se, nuk ka asnjë prej tyre në gjendje të rëndë.
Ndërkohë, Inspektorati Shtetëror Shëndetësor menjëherë sapo është njoftuar për këtë ngjarje në gjimnazin “Janaq Kilica”, në qytetin e Fierit ka nisur grupet e inspektimit në terren për verifikim dhe marrjen e masave të menjëhershme.
Aktualisht, nuk ka të dhëna për ndotje të ajrit në bazë të mostrave të marra nga Njësia Vendore e Kujdesit Shëndetësor Fier. Kjo analizë do të kryhet nesër në orën 07.30 për të vendosur hapjen e shkollës dhe vazhdimin normal të procesit mësimor.
