Ditën e djeshme, disa nxënës të gjimnazit “Janaq Kilica” në Fier shfaqën simptoma helmimi dhe u dërguan menjëherë në spital.
Ata po zhvillonin një orë mësimore dhe kanë filluar të ndihen keq.
Njëra prej studenteve tregoi se ata kishin nisur të ndjenin erë acidi gjatë mësimit, e cila ishte përhapur në të gjithë katin.
Sipas “Abc News”, pista e parë që po hetohet është lënda dezinfektuese e koronavirusit.
Kjo për arsye se është bërë dezinfektimi i shkollës, ndaj nxënësit mund të jenë helmuar nga acidet e përhapura.
Lajmin e dezinfektimit e bëri të ditur kryetari i bashkisë, Armand Subashi.
“Nisëm sot një fushatë dezinfektimi në të gjitha institucionet arsimore, që femijët të jenë më të sigurt në ambientet që ata frekuentojnë. Do të vazhdojmë gjatë gjithë fundjavës dhe me bashkëpunim më të gjithë partneret lokalë, me qëllim që e hëna t’i gjejë gati”- ka shkruar Subashi në statusin e tij në Facebook.
Megjithatë, priten ende të dhëna lidhur me helmimin e nxënësve në gjimnazin e Fierit.
