Ditën e sotme një 60-vjeçar është hedhur nga kati i 3 i spitalit të Sanatoriumit, ku ka qenë i shtruar prej 10 ditësh pasi kurohej nga Covid-19.
Gjendja e tij shëndetësore është agravuar, ndaj ai ka ndërmarrë aktin ekstrem duke i dhënë fund jetës. I ndjeri ka ndërruar jetë në orën 00:30, gjatë kohës që ka pasur një lëvizje më të reduktuar të mjekëve dhe infermierëve.
Kështu, ai bëhet rasti i 5 që ndërmerr aktin ekstrem duke i dhënë fund jetës, sepse më herët janë regjistruar 2 viktima tek “Shefqet Ndroqi” dhe 2 tek “Infektivi”.
Këto ngjarje tragjike kanë ngjallur reagime të shumta ndër radhët e qytetarëve dhe ekspertëve. Së fundmi, mjeku Erion Dashi nëpërmjet një statusi në Facebook i ka bërë thirrje Komitetit të Ekspertëve dhe Ministrisë së Shëndetësisë që të bëjnë të mundur hapjen sa më parë të spitaleve rajonale për trajtimin e rasteve Covid.
Sipas Dashos kjo do të shfrynte presionin mbi spitalet Covid.
Papërgjegjshmëria në kulm! Një thirrje për ministrinë dhe komitetin: Hapni urgjent spitalet rajonalë dhe ata lokalë! Shfryni presionin mbi spitalet COVID! Mos u tregoni qytetarëve “strategji” mashtruese nga të cilat nuk keni zbatuar asnjë rresht! Vdekjet e raportuara (ato që nuk fshihen dot) po rriten çdo ditë! Shumë më tepër vdekje nga COVID po ndodhin në shtëpi në pacientë që as diagnostikohen, as raportohen! Vetëm mjekë dhe infermierë kanë vdekur më tepër se 20, sepse janë lënë pa maska dhe mjete mbrojtëse! Jetojmë dhe Europë, në shekullin e 21-të! Pacientët nuk duhet të vrasin veten duke u hedhur nga dritaret e spitaleve! Të paktën, të mos kemi çdo muaj nga një fatkeq që ndërmerr këtë hap ekstrem… O bëni ndonjë lek punë, o ikni! Njerëzit janë lodhur duke dëgjuar demagogjinë tuaj, duke ndjekur të qarat tuaja patetike dhe filmat në stil Bollywood-i! Po kalon çdo cak…
Disa javë më parë ai i ka bërë thirrje qeverisë të lejojë qytetarët të blejnë tamponin dhe ta bëjnë vetë në shtëpi.
Dasho shkruante se Covid-19 ka dalë jashtë kontrollit dhe se qeveria duhet t’u lehtësojë barrën financiare familjeve shqiptare, pasi sipas tij testet e Covid-19 janë shumë shtrenjtë. Ai e vijonte shkrimin e tij duke thënë se më e pakta që mund të bëj sot qeveria është autorizimi i importit të një prej testeve të shpejta që përdoren në Europë dhe lejimi i shitjes së tyre në farmaci.
