Ish-presidenti i Kosovës, Hashim Thaçi, ka mbërritur sot në Kosovë për të vizituar varrin e babait të tij, i cili u varros të martën. Fillimisht, Gjykata Speciale nuk i dha leje për të marrë pjesë në varrim, por më pas e lejoi.
Avioni privat me të cilin Thaçi udhëtoi nga Roterdami u ul në Aeroportin e Prishtinës rreth orës 10:00 të mëngjesit. Nuk dihet ende sa do të qëndrojë në Kosovë, ndërsa në Skenderaj, qytetarë të shumtë po vazhdojnë të shprehin ngushëllimet për familjen.
Reagimet për vizitën nuk munguan. Nasim Haradinaj, ish-nënkryetar i OVL-UÇK-së, e kritikoi vonesën e lejes, duke thënë se u lejua “sa për sy e faqe”.
Thaçi ndodhet në paraburgim në Hagë që prej vitit 2020, duke u përballur me akuza për krime lufte dhe krime kundër njerëzimit. Kjo është hera e dytë që i lejohet një vizitë e shkurtër në Kosovë, pas asaj të 13 marsit, kur takoi babanë e tij të sëmurë në QKUK.
