Një incident i pazakontë i ka ndodhur gazetares Beti Njuma në Prishtinë, kur ka shkuar të intervistojë Presidentin e Kosovës Hashim Thaçi.
Beti Njuma, drejtoreshë e informacionit të “Ora News”, kishte planifikuar një intervistë me Thaçin ditë më parë, i cili madje kishte pranuar, por në fund intervista nuk u realizua.
Kamerat ishin vendosur, gazetarja dhe i ftuari po ashtu, dritat e bliceve ishin ndezur, por Hashim Thaçi pasi u ul në karrige, refuzoi të japë intervistë.
Shkak ka qenë pyetja e parë e gazetares e cila lidhej me një sondazh të Berat Buzhalës në gazetën “Express” për mbështetjen mes kryeministrit Haradinaj dhe presidentit Thaçi.
Sipas sondazhit, 82 për qind e votuesve kanë qenë pro kryeministrit Haradinaj ndaj dhe pyetja ishte: Pse ky perceptim i publikut për presidentin e republikës?
Sapo dëgjoi “Berat Buzhala dhe gazeta Express…”, presidenti Thaçi bojkotoi intervistën, u ngrit nga kolltuku dhe tha: “Nuk e bëj intervistën…”.
“Ora News” raporton se grupi i xhirimit dhe gazetarja po kthehen në Tiranë dhe kjo është hera e parë që një zyrtar i lartë pranon të intervistohet dhe më pas të bojkotojë intervistën.
