Në mbledhjen e jashtëzakonshme të qeverisë, kryeministri Edi Rama kërkoi nga të gjithë institucionet që të ndajnë një pjesë të kohës të festave me njerëzit që janë akomoduar në hotele e çadra.
Kreu i qeverisë bëri thirrje të organizoheni të gjithë për të ndarë një pjesë të kohës së festave me të prekurit nga tërmeti, duke i vizituar, dërguar dhurata për Vitin e Ri.
Rama kërkoi nga të gjitha institucionet të bëjnë solidaritet dhe të kontribuojnë me dëshirë, ndërsa hodhi poshtë pretendimet se punonjësit janë detyruar për ta bërë një gjë të tillë.
Festat e fundvitit sipas tij, do të kalojnë pa shpërblime dhe festa në institucionet shtetërore.
“Edhe diçka që lidhet me vendimin që do të kalojmë për krijimin e përdorimit të fondit të veçantë të ndryshuar.Është vendim që ndalon rreptësisht përdorimin e fondit të veçantë në veprimtari social-kulturore dhe shpërblime punonjësish në institucione për Vitin e Ri, ato që bëhen zakonisht. Dua të falenderoj të gjithë ata që zemërgjerësisht kanë marrë pjesë në dhurim, kryetarë bashkish, drejtues institucionesh, punonjës.
E refuzoj komplet atë shpifjen tjetër që medemek ne paskemi detyruar të gjithë punonjësit të japin lekë nga rroga se nuk kemi lekë për rindërtimin. Është e pavërtetë. Asgjë nuk është bërë në mënyrë detyruese, të gjithë kanë qenë të ftuar të japin kontribut vullnetar. Ne vetë i dedikuam rrogën e nëntorit këtij procesi, kryetarët e bashkive bënë të njëjtën gjë, punonjësit jo të gjithë kanë kontribuar dhe nuk ka problem. Nuk ka asgjë me detyrim në këtë proces.
Por askush nuk duhet të dedikojë fond nga institucione buxhetore apo jo buxhetore, nga institucione publike të krijuar me ligj të posaçëm, nga institucione të qeverisjes vendore, njësi të fondeve speciale, ndërmarrje e shoqëri tregtare me kapital mbi 50% shtetëror në varësi të institucioneve qëndrore dhe qeverisjes vendore për Vitin e Ri, për darka e për valle.
Përkundrazi duhet të organizoheni të gjithë që të gjitha institucionet të ndajnë një pjesë të kohës të festave me njerëzit që janë atje. Të shkojnë ti vizitojnë, të çojnë dhurata për Vitin e Ri për fëmijët me një organizim. Të gjitha institucionet të bëjnë solidaritet.
Duhet të mbajmë fokusin këtu. Nga e hëna të kemi qartësisht të ndarë punën me patronazhimin e territoreve. Të gjithë ne këtu duhet të ndajë orë të çdo dite me këta njerëz në këto zona.Duhet të gjithë të përfshihen në këtë proces, ministra, zëvendësministra, drejtues të institucuioneve kryesore.Do zgjasë me muaj të tërë.Rindërtimi do të jetë proces që do të kërkojë kohën e vet”.
