Vijojnë pazaret në kohë krize. Së fundmi në buletin javor të Agjencisë së Prokurimeve Publike janë hapur dy tendera për blerje kitesh.
Hapen 2 tendera me vlerë 138.2 mln lekë për blerje kitesh
Tenderi i parë është hapur nga Qendra Spitalore Universitare Nënë Tereza me fond limit prej 67.3 milionë lekë pa TVSH, me objekt kontrate: “Blerje kite reagente dhe materiale mjekësore për analizat e matësit ne gjak astrupograma (SET për 1 (një) Analizë)”, raporton Shqiptarja.com.
Në tenderin e hapur është vendosur edhe çmimi për çdo njësi që do të blihet. Një njësi për kryerjen e testit nuk duhet të kushtojë më shumë se 305,5 lekë pa TVSH, dhe fituese do të shpallet kompania me ofertën më ekonomike të favorshme. Kompanitë e interesuara duhet të dorëzojnë ofertat deri më datë 28 shtator, dhe kohëzgjatja e kontratës është 24 muaj.
Tenderi tjetër i hapur është nga Qendra Kombëtare e Transfuzionit te Gjakut Tiranë, me fond limit prej 70.8 milionë lekë. “Objekti i kontratës/marrëveshjes kuadër “Blerje kite reagente për testimin me metodën NAT (përfshire vënien ne përdorim te aparateve sipas specifikimeve teknike) Marrëveshje kuadër me një operator ekonomik ku te gjitha kushtet janë përcaktuara për një periudhe 12 mujore”, thuhet në dokumentin e tenderit.
Kohëzgjatja e kontratës do të jetë 12 muaj duke filluar nga data e nënshkrimit të marrëveshjes ndërsa ofertat duhet të dorëzohen deri në 28 shtator 2020.
Kitet për testet e Covid-19 merren me nga 2 dollarë
Dy javë më parë gazetari Klodian Tomorri ka publikuar një faturë ku shihet se në total 100 kite që shërbejnë për testet për Covid-19, kanë kushtuar 200 dollarë. Faturën, Tomorri e ka publikuar në profilin e tij në Facebook, ku shkruan se një kit kushton vetëm dy dollar, e ndërsa njerëzve në spitale private, të cilat tashmë janë të licensuar për të bërë testet për koronavirusin, po ua shesin me nga 100 dollarë.
Si duket, qeveria për dy dollarë ka vendosur që të pasurojë spitalet dhe laboratoret private si dhe të hapë tendera që kushtojnë sa qimet e kokës.
Testet duhet të kryhen falas për të gjithë
Pasi Ministria e Shëndetësisë vendosi lejimin e zhvillimit të analizave të Covid-19 edhe në klinikat private, “iconstyle.al” ka ndjekur me shqetësim se si po zhvillohen, duke denoncuar disa herë çmimet abuzive.
Disa ditë më parë sollëm në vëmendje se si shqiptarët po paguajnë më shumë se kushdo në rajon për kryerjen e analizave serologjike dhe tamponit. (KLIKO)
Aparatura që po shihni në foto është prodhim i firmës zviceriane “Roche”, e quajtur “Cobas 6800”, e cila kryen tamponin. Nga një komunikim i “iconstyle.al” me përfaqësuesin e kësaj firme në Shqipëri, disa javë më parë na u bë me dije se kjo aparaturë kushton 320 mijë euro dhe kryen 384 teste në orë, që përkthehen në 9,240 teste në ditë.
Kjo do të thotë se një laborator në vendin tonë me çmimin 95 euro të tamponit arkëton 877,800 euro në ditë dhe për 30 ditë 26, 334,000 euro. Pra, përfiton shifra marramendëse, kur kostot duken të papërfillshme.
Sipas asaj që kanë deklaruar disa nga mjekët më të njohur të vendit tonë një pajisje, që quhet ECMO, pajisje e kujdesit intensiv, shumë e vlefshme për të shpëtuar jetët e pacientëve të intubuar i mungon vendit tonë. Kjo pajisje kushton rreth 60-70 mijë euro dhe konsiderohet si pajisja e fundit e “mrekullive” në mjekësinë moderne.
Disa kohë më parë shefi i Kardiokirurgjisë në QSUT, Edvin Prifti tha në një intervistë se kjo pajisje bën oksigjenimin artificial të gjakut, duke lënë në qetësi mushkëritë, në këtë mënyrë ndihmon pacientët e intubuar nga Covid-19. Sipas Priftit 50% të të sëmurëve që janë në ECMO dhe janë me Covid kanë arritur të mbijetojnë.
Ndër të tjera ai u shpreh:
Në varësi shkon nga 60-70 mijë euro. Në një emision Arben Gjata na e premtoi se kishte një premtin nga universiteti i Barit për të bërë disa dhurata për aparate të tilla, por më pas nuk e di çfarë u bë.
Me një llogari të thjeshtë, për 10 pajisje ECMO që i duhen vendit tonë sipas ekspertëve, me nga 70 mijë euro(referuar deklaratës së Edvin Priftit) do duheshin 700 mijë euro. Nëse iu duket një shifër e madhe, iu kujtojmë se gjatë periudhës së epidemisë, “Farma Net Albania” ka përfituar nga institucionet shtetërore, rreth 3.5 milion euro tendera kryesisht për blerje maskash, ku të gjithë janë zhvilluar me negocim dhe pa garë.
Për rikujtesë, më 20 mars Operatori i Shpërndarjes së Energjisë Elektrike (OSHEE), ka shpallur “Farma Net” fituesin e tenderit për blerjen e maskave respiratore me valvul FPP1, me një shumë prej 12.6 milionë lekësh të rinj. Pas një kërkimi në treg, rezulton se një maskë e tillë në një farmaci në Tiranë, kushton 850 lekë. Me një llogari të thjeshtë, rezulton se OSHEE ka porositur mbi 14 mijë maska, numër ky shumë i madh në krahasim me numrin e punëtorëve.(Lexo këtu)
“Farma Net Albania” ka vijuar të pasurohet edhe më tej, pasi ka fituar edhe dy tendera të tjerë për shumën e mbi 100 mijë eurove, sërish për pajisjen me maska të punonjësve të Postës Shqiptare dhe OSHEE. (Lexo këtu)
ECMO, mund të ishte pjesë e terapisë intensive në shërbimet tona reanimatore. Kjo pajisje mund ishte shumë e vlefshme jo vetëm, në spitalet publike por, dhe ato jo-publike. Po ashtu, Ministria e Shëndetësisë mund të kishte investuar në burime njerëzore dhe materiale për të përballuar fluksin në kryerjen e analizave që ia ka kaluar privatit, duke i kursyer një barrë të madhe shqiptarëve.
Për shpëtimin e jetës, gjithçka ia vlen, por kjo nuk vlen për politikën shqiptare!
