Ditën e sotme, Kosova ka marrë statusin e anëtarit të asociuar në Asamblenë Parlamentare të NATO-s. Shumica e vendeve kanë votuar pro, një votë ka qenë kundër dhe 14 vende tjera kanë abstenuar, në takimin e Asamblesë që u mbajt në Sofje të Bullgarisë.
Kryeministri i Kosovës, Albin Kurti, e konsideron si hap të rëndësishëm drejt integrimit euro-atlantik, miratimin e rekomandimit për avancimin e statusit të Kosovës nga anëtare vëzhguese në anëtare të asociuar në Asamblenë Parlamentare të NATO-s.
“Në prag të 25-vjetorit të çlirimit, Sofja, kryeqyteti i shtetit që 25 vjet më parë hapi hapësirën e vet ajrore për aeroplanët e NATO-s në fushatën kundër Serbisë, sot ishte vendtakimi në të cilin bëmë një hap të rëndësishëm në integrimin euro-atlantik, përkundër fushatës së Serbisë”- ka shkruar Kurti në rrjetet e tij sociale
Presidentja Vjosa Osmani është shprehur e lumtur me vendimin që mori Asambleja Parlamentare e NATO-s duke thënë se fati i Kosovës është NATO.
“Do të vazhdojmë përpjekjet tona së bashku me aleatët tanë për të çuar përpara edhe rrugën tonë drejt anëtarësimit në NATO”, tha Osmani.
Me këtë vendim Kosova është vetëm një hap larg anëtarësimit me të drejta të plota në Asamblenë Parlamentare të NATO-s, gjë që sigurisht se do të ndikojë në stabilitetin e Ballkanit. Vendimin e kanë mirëpritur edhe partitë politike opozitare duke thënë se Kosova e ka vendin në NATO.
