Në përvjetorin e ndarjes nga jeta të historianit dhe kritikut të artit shqiptar, Gëzim Qendro, bashkëshortja e tij Arta Marku ishte sot në emisionin e Rudina Magjistarit për të folur për mungesën e tij dhe kujtimet më të bukura që i ka lënë pas.
Arta u përlot në studio pasi kujtoi se edhe pse kanë kaluar 12 muaj që nuk është pranë saj, ajo ende e hap celularin për të parë mos ndoshta i ka ardhur një mesazh nga bashkëshorti.
E pyetur nga Rudina se si e kujton atë, Arta Marku dha një mesazh mjaft prekës që na emocionoi:
“Ishte takimi me njeriun ideal në jetën time. Jam shumë krenare që e kam takuar. Një shoqja ime më tha: ‘Mos u mërzit që nuk e ke, gëzohu që e pate. Ndaj jam shumë e gëzuar që e pata”.
Ajo preferoi ta mbyllte bisedën në studio me një shprehje dhe mesazh të bashkëshortit Gëzim Qendro se: “Dashuria duhet dëshmuar!”
Ndaj u shpreh se nuk është kurrë vonë për të folur për të.
Gëzim Qendro ndërroi jetë në moshën 60-vjeçare pas 1 vit përpjekje kundër sëmundjes së pashërueshme.
Me studimet e tij të botuara brenda e jashtë vendit Gëzim Qendro krijoi një vetëdije që mendimi kritik shqiptar në artet pamore, të futet në rrjedha moderne.
Ai ka qenë profesor në auditoret e Tiranës dhe Prishtinës dhe drejtor i Galerisë Kombëtare të Arteve në vitet 1997-2002. Qendro ishte iniciator i krijimit të bibliotekës së Galerisë Kombëtare.
