Është e lehtë të kuptosh pse celebrities i dashurojnë mbrëmjet gala të bamirësisë: kapen nga kamerat të veshur bukur, shfaqen me miqtë e famshëm dhe në fund lavdërohen nga shtypi.
Por aktori i famshëm Sean Penn, drejtues i një shoqate bamirësie, thotë se në të vërtetë shumica prej tyre vetëm shfaqen për të kryer detyrën dhe largohen pa dhuruar.
Në një intervistë për “Haute Living”, 56-vjeçari tregoi se në galanë e përvitshme të fondacionit të tij në ndihmë të Haitit, paratë vijnë gjithmonë nga i njëjti grup i vogël njerëzish.
“Ka shumë pak njerëz të jashtëzakonshëm në eventet e bamirësisë, pjesa më e madhe e sallës mbushet me njerëz që nuk japin asnjë cent”, shprehet fituesi i çmimit “Oscar”.
“Ata hanë, shikojnë yjet dhe shijojnë muzikën, por të them të drejtën, nuk mendoj se ka pasur ndonjë njeri që do të varfërohej po të jepte 25 dollarë. Këtë nuk e kam kuptuar asnjëherë”, shton ai.
Por, për fat të mirë, ata që dhurojnë, dhurojnë shumë. Vitin që shkoi u grumbulluan plot 7 milionë dollarë.
“Nëse je pjesë e industrisë së filmave, duhet të dish të ndash gjërat që ke. Nëse nuk e bën, mos iu fut këtij biznesi”, thotë Penn.
Aktori ka qëndruar vetë në Haiti për të kuptuar se çfarë përjetojnë banorët atje çdo ditë.
Burimi: Daily Mail
