Rey Manaj, sulmuesi i kombëtares shqiptare të futbollit dhe Barcelona B, ka rënë pre e një grabitje. Sulmuesi shqiptar, i cili dje shënoi jo një, por dy gola, duke i dhënë një pikë Barcelonës B ndaj Prat në transferim (2-2), në Divizionin e dytë në Spanjë nuk ka mundur të festojë pasi ka mësuar më pas lajmin e keq se në shtëpinë e tij kanë hyrë disa hajdutë.
Në mediat spanjolle nuk është raportuar ende diçka e tillë, por lajmin e ka bërë të ditur menaxheri i VIP-ave, Xhani Demika. Ai ka zbuluar se disa hajdutë kanë hyrë brenda shtëpisë së Manaj në Spanjë dhe i kanë vjedhur sende me vlerë.
Xhani ka publikuar edhe foto nga shtëpia e Manajt, që ka mbetur gati e shkatërruar pasi hajdutët kanë hyrë me forcë brenda saj. Në foto shihet edhe policia që po bën investigimet për të zbuluar kush ka gisht në këtë ngjarje. Është mësuar se hajdutët i kanë vjedhur sulmuesit të kombëtares shqiptare 3 orë të shtrenjta dhe 70 mijë euro cash.
“Sapo mora vesh një lajm shumë të shëmtuar është thyer shtëpia e Rey Manaj në Spanjë një gjest shumë i ulët shpresoj vëlla të gjenden sa më shpejt pasi dhe vlera nuk ishte e vogël. 3 ora super të shtrenjta dhe 70 mijë euro të vjedhura”, shkruan Xhani në postimin e tij.
