Zgjedhjet e sotme vendore kanë tërhequr vëmendjen edhe të mediave të huaja. Ata kujtojnë rëndësinë që kanë për të përcaktuar nëse Shqipëria është apo jo gati për t’u bërë pjesë e Bashkimit Evropian.
Sipas analizës së gazetarëve të huaj, pas fushatës së trazuar që vuri në konflikt ish-koalicionin në fuqi PS-LSI dhe kjo e fundit doli më vete, si edhe çadra e Lulzim Bashës përpara kësaj, këto zgjedhje do të jenë, një provë nëse mund t’ia dalim t’i çojmë deri në fund paqësisht këto zgjedhje.
Por dika që ka tërhequr vëmendjen është mbizotërimi i frymës së festës së Bajramit se sa i zgjedhjeve, në rrugë dhe mes njerëzve.
Euronews
“Shqiptarët i drejtohen votimit këtë të diel të 25 qershorit, në një proces zgjedhjesh të përgjithshme që besohet se do të përcaktojë a është apo jo gati shteti në Ballkan të jetë pjesë e Bashkimit Evropian.”
Deutsche Welle
“Këtë fundjavë, shqiptarët zgjedhin parlamentin e ri, por nuk ka foto të kandidatëve nëpër rrugë. Në fakt, bulevardi kryesor i Tiranës është mbushur me postera që i urojnë njerëzve “Gëzuar Ramazanin”.
Media shkruan se, vite më parë shqiptarët do të ishin në sherr e sipër në një ditë si kjo por tani, pas gjithë bojkotit nga ana e PD-së dhe situatës së vështirë, ata nuk grinden më me njëri-tjetrin nëpër kafene.
“As në kafenetë me të populluara nuk dëgjon ndonjë debat të nxehtë mes mbështetësve tradicionalë të Partisë Socialiste apo të Partisë Demokratike. Në Shqipëri, debate të tilla ndonjëherë përfundonin me akte dhune, sulme e deri në vrasje.”
Balkan Insight
“Të dielën, shqiptarët shkojnë në votime për zgjedhjet parlamentare- hera e nëntë që kur pluralizmi politik u ligjërua në 1990-ën. Shteti ka ndryshuar në mënyrë radikale që prej ditëve të qeverisjes njëpartiake, kur një fletë votimi pa shenjë do të thoshte një votë për Partinë e Punës. Por shenjat e totalitarizmit kanë rrënjë të thella, dhe demokracia mbetet një synim i largët.”
“BI” nuk ia vë fajin shqiptarëve: ndërkombëtarët në fakt, nuk kanë ndonjë kërkesë të lartë për këto zgjedhje ashtu siç nuk kanë patur ndonjëherë.
“Pavarësisht ecurisë, me siguri vëzhguesit ndërkombëtarë do ta japin miratimin e tyre duke i pranuar rezultatet teksa do të dëgjojnë një mal me ankesa. “Të përshtatshme dhe të pranueshme”- kështu i quajtën vëzhguesit ndërkombëtarë zgjedhjet e 1997-ës dhe as tani, qasja me standarde të ulëta nuk ka ndryshuar.”
