Vetëm pak ditë më parë ajo dhe bashkëshorti i saj festuan 11-vjetorin e dashurisë së tyre. Një familje e lumtur që është bekuar me dy engjëj të bukur që ua zbukurojnë jetën çdo ditë e më shumë. Bëhet fjalë për këngëtaren e njohur Orgesa Zaimi, e cila dje ishte e ftuar në emisionin “Pasditja ime” në “RTSH”.
Orgesa foli në këtë emision për stilin e saj të veshjes. Në qoftë se iu hedhim një sy rrjeteve të saj sociale shohim se si Orgesa herë shfaqet e veshur si një vajzë kolegji dhe herë të tjera si një rokere e lindur.
Në studio ajo kishte marrë me vete disa nga veshjet e saja më të bukura skenike, por edhe nga ato që vesh në përditshmëri. Dashuria më e madhe e saj ishte një fustan i punuar i gjithi me dorë të cilin e ka veshur ditën e fejesës së saj.
Jemi mësuar që vajzat e reja që fejohen në ditët e sotme t’i shohim të veshura me veshje firmato që kushtojnë një “thes” me lekë, por Orgesa na ka habitur të gjithëve kur tha se fustanin e fejesës e kishte blerë te “Gabi”.
“Është i punuar i gjithi me dorë, e kam blerë në dyqane të dorës së dytë ose siç thuhet tek ‘gabi’, por mua më pëlqen shumë dhe më ka qëndruar shumë bukur në trup”, tha ndër të tjera Orgesa gjatë intervistës.
