Reshjet e shiut shkaktuan rënie masive gurësh në orët e para të mëngjesit të sotëm në aksin Elbasan – Tiranë duke bërë të pamundur lëvizjen e automjeteve në këtë drejtim. Në këtë segment rrugor, rreth 2 km pa arritur tek tuneli, rruga është bllokuar nga sasia e madhe e gurëve.
Autoritetet bëjnë me dije se kjo ka ndodhur për shkak të reshjeve të shiut, e për pasojë, kjo rrëshqitje ka bllokuar kalimin e mjeteve në sensin Elbasan-Tiranë.
Autoriteti Rrugor Shqiptar ka ndërhyrë menjëherë bashkë me firmën e mirëmbajtjes dhe po punohet intensivisht për të hapur plotësisht kalimin.
Është vendosur sinjalistika paralajmëruese, si dhe është devijuar kalimi i mjeteve nga Elbasani drejt Tiranës nga rruga e vjetër.
“Aktualisht qarkullohet pa probleme në sensin Tiranë – Elbasan ndërsa për sensin Elbasan – Tiranë, kërkohet mirëkuptimi i qytetarëve deri në pastrimin e plotë dhe sigurimin e zonës së rrëshqitjes. ARRSH do ju mbajë të informuar për më tej për ecurinë e ndërhyrjes në terren”, njofton zyrtarisht ARRSH.
