Grupi “Alar Band” dhe Eva Aliko u prezantuan së bashku për disa javë në spektaklin “C’est la Vie”. Një eksperiencë shumë e bukur si për djemtë edhe për aktoren e njohur.
Në një intervistë për “Chaud patate” në NRG radio, djemtë e “Alar Band” rrëfyen disa detaje që nuk i dinim në lidhje me Evën gjatë konkurrimit të tyre të përbashkët.
Ata treguan se e duan shumë aktoren, por në të njëjtën kohë zbuluan se ajo i kishte”çmendur” me preferencat e saj muzikore.
“Ja kaluam shumë bukur te ‘C’est la Vie’, përveçse Eva na çmendi me ato këngët. Marrëdhënia me të ishte shumë, shumë, shumë e mirë, por zgjidhte këngë nga ato, post Enver Hoxha”,- thanë ata duke qeshur.
Djemtë të pyetur nga gazetari për prapaskenat gjatë spektaklit, kujtuan sërish partneren e tyre, Evën.
“Eva gjithmonë para se të dilte në skenë, po mos të ikte 20 herë në tualet dhe po të mos e merrnim ne me autoporlant ‘Evaaaa… ku je se kemi radhën, o Eva?’ . ‘Jam në tualet, po vij’, thoshte. Të gjithë mendonin se ajo ikte se vuante nga veshkat, por në të vërtetë ajo këndonte në tualet”,- u shprehën ata duke i thënë: “Eva të duam shumë, bëmë shaka deri tani.”
