Xhevat Halilajn, nga fshati Bicaj i Kukësit, e takuam në oborrin e Pediatrisë në QSUT në Tiranë. Ka që në orët e para të mëngjesit që qëndron në dyert e reanimacionit ku prej rreth dy javësh, pret të mësojë çdo të ndodhë me vogëlushin e tij 16-ditësh, Xhevahirin, i cili mban emrin e nënës së tij të ndjerë.
Xhevahire Halilaj, vetëm 34-vjeçe, u nda nga jeta tragjikisht më 29 dhjetor të 2019-ës, si pasojë e komplikacioneve pas lindjes së djalit, i cili është fëmija i katërt i çiftit. Ato momente që duhej të ishin të mbushura me gëzim, u shndërruan në një makth, në çastin që mjekët dolën nga salla për të lajmëruar se nëna e 4 fëmijëve kishte rënë në koma, për të mos u zgjuar më.
Ndarja e saj nga jeta që për familjarët është ende e pazbardhur, i ka lënë Xhevatit mbi supe një peshë të madhe: rritjen e 4 fëmijëve si një baba i vetëm. “Nuk isha i përgatitur fare për këtë!”-shprehet ai teksa ngjisim shkallët e spitalit, dukshëm i pasigurt për të ardhmen që e pret, duke mos pasur as të ardhurat ekonomike për të përballuar situatën.
Xhevahiri i vogël, prej më shumë se dy javësh ndodhet në QSUT si pasojë e një sëmundjeje të veshkave të diagnostikuar që në muajin e shtatë të shtatzënisë. Vetëm 7 ditë pas lindjes, ai i është nënshtruar ndërhyrjes së parë në veshka e cila rezultoi e suksesshme dhe është nën vëzhgimin e mjekëve të Pediatrisë në QSUT që po ndjekin me përkushtim rastin e komplikuar.
Megjithatë, si pasojë e diagnozës që ka vogëlushi, për një kohë të gjatë do të duhet të qëndrojë në spital në Tiranë për mjekim të specializuar, duke ia bërë edhe më të vështirë të gjithë këtë situatë Xhevatit.
“Tre fëmijët e tjerë janë në Kukës. Unë shkëputem vazhdimisht që vij të shoh djalin e të flas me mjekët në Tiranë, por fëmijët nuk i lë dot gjatë vetëm se janë të vegjël dhe nëna e babai im janë të moshuar e të sëmurë, nuk kujdesen dot për ta.”-shprehet Xhevati. Megjithatë, përballë kësaj sprove të mundimshme, ai nuk është dorëzuar.
Me ndihmën e familjarëve, ai po përpiqet që së bashku me tre fëmijët e tjerë, Julian 10 vjeçe, Xhensilën 4 vjeçe dhe Alteon 2 vjeç, të zhvendoset në Tiranë për të qëndruar pranë vogëlushit që do të ketë nevojë të vazhdueshme për kujdes shëndetësor. Duke qenë në pamundësi ekonomike përpara kësaj situate tejet të vështirë, kushdo mund të kontribuojë për të lehtësuar sadopak gjendjen e tyre, për t’i ndihmuar për të siguruar një shtëpi të re, një dado për fëmijët e për të mundësuar shkollimin e tyre.
Jeni të ftuar t’i vini në ndihmë familjes Halilaj, duke kontaktuar me iconstyle.al.
