Një rast suksesi u arrit tek një paciente e diagnostikuar përpara shtatzënisë me trombocitopenia, purpure idiopatike. Lajmi u bë i ditur nga ministrja e Shëndetësisë dhe Mbrojtjes Sociale, Albana Koçiu në një postim në rrjetet sociale.
“Falë kësaj ndërhyrje pacientja dhe bebi i saj gëzojnë shëndet të plotë. Ky është rasti i parë në Shqipëri i dokumentuar që një shtatzëni e tillë të shkojë deri në muajin e 9-të duke shpëtuar jetën e nënës dhe vogëlushit të saj”, theksoi Koçiu.
Prof. dr. Eliona Demaliaj tha se “sakrificat e një nëne janë të pafundme. Nëna përpara shtatzënisë vuante nga një patologji e rëndë në shtatzëni. Nëna me dashurinë e madhe për të pasur fëmijë rrezikoi jetën dhe mori përsipër vazhdimin e shtatzënisë, por pati besim tek mjekët dhe sistemi shëndetësor publik dhe duke bashkëpunuar me ne arriti të ketë shtatzëni të suksesshme dhe fëmija të gëzojë shëndet të plotë”.
Gruaja në fjalë quhet Irma Sulaj, 35 vjeç, nga Berati. Ajo erdhi në Tiranë për një trajtim më të kualifikuar, pasi vuan nga sëmundja e rrallë e gjakut.
