Të paktën 50 persona mbetën të vdekur, përfshirë 2 oficerë policie dhe më shumë se 100 të tjerë u plagosën, pasi një person nisi të shtinte me armë gjatë një festivali të muzikës “country” në Las Vegas, mbrëmjen e së dielës. Rreth 30.000 njerëz ishin pjesë e eventit. Policia në Las Vegas mësohet se qëlloi të dyshuarin e sulmit.
Incidenti që tronditi qytetin e kazinove ndodhi në afërsi të hotelit “Mandalay Bay”, e videot në internet tregojnë qartë tmerrin e përjetuar, nga njerëzit e mbledhur në koncertin e hapur, kur mbi turmën u hap zjarr.
Të shtënat ishin ato të një arme automatike dhe nisën në momentin kur po performonte këngëtari Jason Aldean.
Autori i sulmit, 64-vjeçari Stephen Paddock, ka qenë në katin e 32-të të hotelit dhe ka shtënë mbi turmën poshtë pa dallim e pa ndaluar.
“Pati shumë të shtëna, por ato të fillimit i ngjasonin zjarrit të mitralozit”, tha Danny, një turist australian.
Zyrtarët thonë se Paddock u qëllua dhe u vra, pasi ata hynë në dhomën e hotelit, ku ai kishte fshehur një “arsenal” me armë.
Policia arrestoi Marilou Danley, e cila u përshkrua si “shoqëruesja” e Paddock dhe gruaja me të cilën ndante shtëpinë.
Mes të plagosurve, 14 persona janë në gjendje kritike për jetën në spital. Forcat e policisë, që mbërritën me urgjencë në vendin e ngjarjes, i këshilluan njerëzit të largoheshin menjëherë prej andej. Sherifi Joseph Lombardo konfirmoi numrin e viktimave.
“Viktimat janë 50. Deri tani besojmë se bëhet fjalë për një agresor të vetëm, një ujk vetmitar ta quajmë kështu. Efektivët patën një shkëmbim zjarri me personin që ndodhej në katin e 32-të të ndërtesës, e tani ai ka vdekur”, tha Joseph Lombardo.
Policia po përpiqet të flasë me një mikeshë të të dyshuarit, një vajzë me origjinë aziatike e quajtur Marilou Danley. Vendndodhja e saj nuk dihet ende.
Dëshmitarja Breanna Hendricks, e cila po festonte 21-vjetorin, tha për “Daily Mail”, se një grua kishte hyrë në mes të turmës i shoqëruar nga një mashkull dhe thërriste: “Janë kudo… Ju do të vdisni të gjithë sot”. Kjo kishte ndodhur rreth 45 minuta para se mbi njerëzit të hapej zjarr.
Mes të vdekurve ka edhe disa policë që ishin jashtë shërbimit. Shumë hotele të zonës janë mbyllur, së bashku me një pjesë të bulevardit të Las Vegas-it, ndërsa njerëzit e ndodhur aty në kohën e incidentit kanë gjetur strehim nëpër restorantet rreth e rrotull dhe aeroportin “McCarran”, ku për shkak të ngjarjes së rëndë disa fluturime janë devijuar.
*Shfleto galerinë
Burimi: Daily Mail
