Përplasja “live” mes Robert Aliajt dhe Fiori Dardhës ishte një ndër më të përfolurat, në të cilën u përfshinë në njëfarë mënyre edhe personat e tyre të zemrës.
Të kesh një burrë artist si Robert Alij, nuk është e lehtë, por Mimoza Dino di më së miri të jetë jo vetëm bashkëshorte për të.
Në një intervistë të dhënë për “Panorama”, ajo u pyet se si u ndje kur Fiori teksa diskutoi me Bertin, iu drejtua këtij të fundit me fjalët: “Jepja këtë mikrofonin gruas që ke lënë në Bruskel, mjerë gruaja që të ka”.
“Bertin në panelin e “Dance With Me” nuk e shikoj si bashkëshortin tim. Distancohem emocionalisht, e shikoj thjesht si një anëtar jurie. Në rastin e replikës me Fiorin, unë mendoj se ndërkohë që Berti po gjeneralizonte dhe po vinte pikat mbi “i” për një plagë të rëndë të shoqërisë shqiptare, që nuk flitet më për raste të izoluara, si violenca bashkëshortore dhe familjare, Fiori kaloi në një revansh e atak të personalizuar. Unë besoja të paktën se Fiori, me prirjet e pretendimet e saj feministe, që u përpoq në mënyrë konfuze t’i manifestojë në mbrëmjet e “Dance With Me”, në çdo rast nuk do të dilte kaq në mënyrë flagrante kundër principeve të saj, duke fyer publikisht në distancë po një femër, një grua tjetër, që ajo nuk e ka idenë cila është dhe çfarë përfaqëson, pavarësisht se isha unë bashkëshortja e Robertit apo e dikujt tjetër. Nëse asaj batutat e Bertit iu dukën provokative, duke mos u përgjigjur do të kishte refuzuar dhe kjo do të tregonte klasin e saj, gjë të cilën ajo nuk e bëri dot. Reagimi i saj nuk meriton më shumë komente”, u përgjigj ajo.
