Dy këngëtarët shqiptarë, Eugent Bushpepa dhe Eleni Fourera na bënë të gjithëve krenarë teksa disa ditë më parë u shfaqën duke treguar mbështetjen ndaj njëri-tjetrit, dhe bënë me dorë simbolin e shqiponjës.
Pikërisht ky gjest i këngëtares shqiptare, e cila përfaqëson Qipron në “Eurovizion” ka bërë jehonë të madhe në mediat greke, të cilat e kanë cilësuar si një gjest provokues.
Televizioni “Star” shkruante në faqen e tij në internet se veprimi i dy këngëtarëve tregonte “Shqipërinë e Madhe”, duke e lidhur me nacionalistët dhe UCK-në.
“Të gjithë e dimë që ky symbol që ka bërë Eleni me këngëtarin shqiptar përfaqëson idenë që shqiptarët kanë për “Shqipërinë e Madhe”, por me siguri Eleni nuk është në dijeni të një fakti të tillë ndaj e ka bërë atë veprim. Më duket se Eleni me këtë simbol tregon se nuk është nga Meksika” , komentoi me ironi, njëra prej gazetareve në studion e televizioni “Star”.
Pas këtyre deklaratave të zhurmshme ka reaguar më në fund vet Eleni, nëpërmjet një postimi në Instastory.
“Muzika është për të bashkuar dhe jo ndarë njerëz, e prandaj jam këtu pa asnjë lidhje me gjithë këto çështje nacionaliste që disa njerëz më akuzojnë mua. Me të vërtetë e dua Greqinë dhe askush e asgjë nuk mund ta ndryshojë këtë. Le të shkojmë tani e të përfaqësojmë Qipron në mënyrën më të mirë”, shkruante Eleni në postimin e saj në Instastory.
