Megjithëse ka mbi 33 mijë ndjekës në Instagram dhe ndan rregullisht momente nga jeta e saj, influencuesja 24-vjeçare Tawana Musvaburi zgjedh të mos e shfaqë partnerin e saj. Ndonëse herë pas here ndjekësit mund të dallojnë detaje të vogla, si dy gota vere në një darkë apo pjesa e pasme e kokës së dikujt në kornizë, ajo thotë se nuk ka ndërmend ta zbulojë fytyrën e tij.
,“Jam thjesht e fiksuar pas vajzave” shprehet Tawana. “Si grua, dua të dukem e fortë, e pavarur, që i bëj gjërat vetë. Nuk më pëlqen ideja të duket sikur dikush më ndihmoi.”
Ajo ka ndërtuar një identitet online ku fuqizimi femëror dhe pavarësia janë thelbësore. Sipas saj, edhe nëse marrëdhënia e saj shkon drejt një hapi më të madh, kjo nuk do të thotë se ajo do ta publikojë.
“Një unazë nuk më mjafton për ta bërë publike,” thotë ajo me vendosmëri.
Kjo qasje nuk është vetëm personale. Në muajt e fundit, në rrjetet sociale është vënë re një lëvizje e re ku shumë gra vendosin të mos e ekspozojnë partnerin e tyre. Tendenca u vu në qendër të diskutimit pasi revista British Vogue botoi artikullin viral: “A është e turpshme të kesh një të dashur tani?”
Sipas autores Chante Joseph, ka ndryshuar mënyra se si gratë e shfaqin veten në internet. Në vend që një lidhje të shihet si arritje, sot shpesh perceptohet si cenim i imazhit të pavarësisë.
“Të postosh shpesh partnerin mund të duket sikur je e fiksuar tek ai, ose sikur identiteti yt lidhet me të,” shkruan ajo.
Kjo qasje po reflektohet edhe te influencueset e tjera. Stephanie Yeboah, krijuese përmbajtjeje nga Londra, thotë se humbi rreth 1000 ndjekës sapo postoi për herë të parë të dashurin e saj.
“Njerëzit më thanë se nuk mund të lidhen më me mua,” rrëfen ajo. “Shumë përmbajtje për marrëdhëniet është e lodhshme për publikun.”
Sipas ekspertes së mediave sociale, Dr. Gillian Brooks, kjo lidhet me faktin se influencuesit “shesin një estetikë dhe një version të vetes”. Nëse përfshijnë partnerin, mund të prishin pritshmëritë e audiencës së tyre.
Por ky fenomen nuk kufizohet vetëm tek figurat publike.
Shumë gra të zakonshme ndihen njësoj.
Milly, e fejuar prej pesë vitesh, thotë se nuk e poston partnerin për të ruajtur identitetin e saj:
“Nuk dua të dukem sikur marrëdhënia është i gjithë personaliteti im.”
Ndërsa Charlotte, e lidhur prej dy vitesh, beson se marrëdhëniet duhet të jenë më private se miqësitë:
“Nëse do ta postoja, do të dukej sikur po shisja imazhin e një lidhjeje të përsosur. Nuk është e vërtetë.”
Nga ana tjetër, disa e lidhin këtë me “syrin e keq” dhe frikën nga zilia.
Ekspertët theksojnë se një arsye tjetër është edhe “përjetësia” e rrjeteve sociale.
“Njerëzit po kuptojnë se gjithçka që postojnë, mbetet,” thotë psikologia Dr. Gwendolyn Seidman. “Prandaj tregohen më të kujdesshëm.”
