Ndërkohë që po mburremi me turizmin në vitet e fundit, le t’i hedhim pak sytë nga Golemi i Durrësit.
Kjo zonë është lënë në mëshirë të fatit, duke nisur që nga infrastruktura e ndërtimet pa kriter, e deri te mirëmbajtja e pirgjet e plehrave që lulëzojnë.
“Monitor.al” ka sjellë një reportazh special për Golemin, të cilin me të drejtë e krahason me Kandaharin. Për ju që nuk e njihni, Kandahari është një provincë në jug të Afganistanit, totalisht e shkatërruar nga lufta.
“Golemi në Durrës, është zona që po përjeton rritjen më të madhe të turistëve të huaj, por që ngjan me Kandaharin nga infrastruktura skandaloze, pirgjet e pafundme me inerte, plehrat në çdo cep dhe ndërtimi pa kriter. Këtu shkatërrimin nuk e ka bërë lufta, por indiferenca dhe pingpongu i qeverive vit pas viti”, thuhet në artikull.
Përpos atyre që jetojnë çdo ditë atje, dëshmitarë të zonës së tmerrshme të turizmit në Golem janë bërë edhe turistët e parë nordikë të cilët mbërritën më 12 maj, dhe iu desh të kalonin në rrugën dytësore të Golemit me gropa të pafundme, ku as autobusi nuk hynte dot.
Vit pas viti, agjencitë kanë kërkuar nga tur-operatorët vendas që të transmetojnë pranë qeverisë shqetësimin për infrastrukturën, por fjalët kanë rënë në vesh të shurdhër.
Sikur të mos mjaftonte gjendja e mjerueshme e turizmit, imazhi negativ nga protestat e dhunshme ka ndikuar gjithashtu në uljen e numrit të rezervimeve nga turistët.
Një vajzë e re që është larguar nga Shqipëria dhe ka nisur punë në Gjermani si infermiere, tha për “iconstyle.al” se shtetasit atje e shohim me shumë frikë situatën në Shqipëri:
“Një zonjë për të cilën kujdesem, më tha: Merr me vete një thikë kur të shkosh në Shqipëri se nuk i dihet”.
Pasiguria dhe kaosi është dëmi më i madh që po i bëhet turizmit, dhe kjo përkthehet edhe në shifra.
“Demonstrimet e dhunshme ka ndikuar dy herë më shumë te turistët e huaj që kanë ulur prurjet me 4,8%, ndërsa më pak tek turistët vendas, të cilët kanë ulur lëvizjet me 1,8%”, sipas “Tourism Review News”.
Është e pafalshme që me gjithë këto burime që na ka falur natyra, të mos dimë t’i shfrytëzojmë, duke u prirur ta futim vendin në një krizë politike që do të kthehet shumë shpejt në një krizë ekonomike rrënuese për vendin.
/Përshtatur nga Monitor.al
