Vrasja e 25-vjeçarit Klodian Rasha nga një efektiv policie ka ngritur në këmbë popullin shqiptar dhe protesta të dhunshme janë organizuar për kërkimin e drejtësisë.
Mes personazheve të njohur të showbiz-it që kanë “dënuar” publikisht këtë ngjarje, ka reaguar edhe këngëtarja Olta Boka.
Ajo s’ka mundur dot ta shmangë për më gjatë lajmin e keq, duke i dedikuar një postim në InstaStory të riut që humbi jetën tragjikisht.
“U bëra kohë që e shmang lajmin e keq se më mërzit, por vrasja e Klodianit është më shumë se lajm i keq! Gjynah për atë filiz që iku padrejtësisht, për familjarët që iu këput një pjesë e shpirtit… Gjynah si je katandisur Shqipëri!”- janë fjalët e Oltës.
25-vjeçari Klodian Rasha u vra nga një efektiv policie në zonën e Laprakës, në rrugën “Dritan Hoxha” rreth orës 1:45 të mëngjesit, ndërsa efektivi Nevaldo Hadëraj është prangosur 12 orë më pas. Polici ishte duke patrulluar në Laprakë, kur ka pikasur të riun i cili ishte duke lëvizur përtej afatit të lejuar nga autoritetet dhe i ka kërkuar të ndalojë. I riu nuk ka pranuar dhe polici e ka ndjekur të riun, e ka qëlluar duke e plagosur me dy plumba, një në kokë dhe një në shpatull.
Klodian Rasha ka ndërruar jetë në spital ndërsa familja mohoi ekzistencën e një arme në dorën e tij. Sipas të dhënave paraprake të ekspertizës, njëri prej plumbave e ka prekur 25-vjeçarin në pjesë e mbrapme të shpatullës dhe kjo i ka dëmtuar organet jetike.
