Ditën e djeshme, “iconstyle.al” ju solli në vëmendje situatën alarmante brenda ambienteve të spitalit Infektiv në Tiranë, nëpërmjet një dëshmie ekskluzive të një personi të prekur nga COVID-19. (Lexo këtu)
Ndryshe nga ç’propagandohet në media, situata në spital është totalisht ndryshe dhe vlen të theksohet se kushtet higjienike janë skandaloze.
Në ambientet e spitalit të Infektivit jo vetëm që tualetet janë të pista, por ka mungesë uji, ndërkohë që është gjëja më minimale dhe e domosdoshme e momentit jo vetëm për ata që janë të shtruar, por edhe për stafin e spitalit.
“Iconstyle.al” bën me dije se uji në këto ambiente po vidhet dhe pacientët nuk kanë mundësi të kenë minimumin e higjienës personale.
Gjithashtu mësohet se gjurmimi i kontakteve të personave të infektuar me Covid-19 nuk po kryhet.
Pacienti i prekur nga virusi ka treguar në dëshminë e tij se megjithëse ka pasur kontakte me familjarët dhe të afërmit, askush nuk është shqetësuar t’i kontaktojë këta të fundit për t’i bërë tamponin.
Pra gjurmimi i kontakteve që në media shitet sikur po bëhet me shumë përkushtim, në fakt është diçka që nuk ndodh fare! Kjo situatë në vend është kthyer në alarmante, duke konsideruar masën e përhapjes së këtij virusi.
Akoma më shqetësues është fakti që mjekët janë indiferentë dhe mësohet se duhet të kesh lidhjet e duhura me stafin drejtues të spitalit, që pacientët të mund të marrin vëmendjen e duhur.
Ndryshe nga ç’thuhet në media për faktin se përdoret Actemra (Tocilizumrab), në fakt në spitalin COVID tashmë kjo nuk përdoret dhe ndryshe nga ç’është thënë nga studimet e mëparshme se ibuprofeni nuk sugjerohet në raste të tilla, mjekët u kanë dhënë pacientëve pikërisht këtë medikament, duke ngritur dyshime të forta për mjekim të pakujdesshëm.
Aktualisht në shërbimin Infektiv po marrin shërbim 78 pacientë, 10 prej tyre janë në terapi intensive ndërsa 1 është i intubuar.
“Iconstyle.al” ka kontaktuar shefen e spitalit Infektiv, Najada Çomon, për t’i kërkuar një informacion lidhur me ndërgjegjësimin që duhet të jetë i shtuar në këtë moment (kur njerëzit vazhdojnë të grupohen pa u shqetësuar), pas konstatimeve të njëpasnjëshme që qytetarët shqiptarë nuk besojnë në ekzistencën e koronavirusit.
Në një sondazh dhe në një rubrikë me pyetje-përgjigje të zhvilluar nga “iconstyle.al” në rrjetet sociale, shumë qytetarë shpreheshin se për shkak se nuk kishin një të infektuar në familje apo në rrethin e tyre shoqëror, dyshonin që rastet me koronavirus që publikohen çdo ditë me shifra në media janë të stisura dhe lojra politike.
I kemi kërkuar gjithashtu zonjës Çomo akses nga ana e mediave për të bërë publike raste konkrete dhe për ta bërë më të prekshme këtë sëmundje. Mirëpo, shefja e Infektivit ende nuk ka kthyer një përgjigje.
Fakti që dëshmitë nga brenda Spitalit Infektiv na tregojnë që kushtet janë kaq të këqija, na shton dyshimet se aksesi minimal i medias i detyrohet pikërisht këtij fakti. Madje, pacientët këshillohen të mos flasin me mediat edhe pasi dalin nga spitali.
Mjafton t’ju rikujtojmë rastin e personave të parë të infekuar, babë e bir që udhëtuan nga Firenze në Tiranë. (Lexo këtu) Ata publikuan foto duke treguar kushtet skandaloze brenda spitalit COVID në Tiranë, mirëpo më vonë “Top Channel” e paraqiti totalisht ndryshe situatën në ambientet e Infektivit.
Në fakt, tashmë që kemi një burim brenda spitalit, realiteti për ne është totalisht ndryshe.
Kjo pakujdesi po e çon vendin tonë drejt një kolapsi dhe ekziston mundësia që shumë shpejt t’i rikthehemi situatës së marsit, apo gjendja të rëndohet akoma më shumë.
Në 3 muajt e fundit kur duhet të ishin marrë masat për një rritje të numrit te te infektuarve pas lehtësimit të masave, nuk kemi ende asnjë progres nga Ministria e Shëndetësisë.
