Çdo person që do të kapet pa maskë në ambientet e mbyllura do të gjobitet me 2 mijë lekë (20 mijë lekë të vjetër).
Ministrja e Shëndetësisë, Ogerta Manastirliu njoftoi sot se “detyrimi për përdorimin e maskave jo mjekësore/barrierave mbrojtëse për mbrojtjen ndaj transmetimit të COVID 19 do të jetë detyrim për çdo individ në të gjitha ambjentet e mbyllura”.
Kështu, maska do të vendoset me detyrim nga SOT në:
-administratën publike dhe jo publike;
-transportin publik;
-zyra,
-shkallë pallati,
-ashensorë,
-në qendrat tregtare, dyqane, supermakatat, tregjet
-dhe njësitë e shërbimit.
Policia e shtetit, policia bashkiake, strukturat e inspektorateve shtetërore, do të monitorojnë dhe penalizojnë me gjobë shkelësit për çdo thyerje të rregullit.
“Detyra dhe qëllimi ynë kryesor është ruajtja e shëndetit. Në funksion të këtij qëllimi, kemi miratuar edhe këtë Akt Normativ dhe për të cilin kërkojmë mirëkuptimin tuaj. Përdorimi i maskës ka një efikasitet të lartë në kufizimin e përhapjes së virusit, mbështetur kjo dhe në rekomandimet e Qendrës Europiane te Kontrollit të Sëmundjeve, Organizatës Botërore të Shëndetësisë dhe e vërtetuar nga eksperienca e shumë vendeve. ‘Sakrifica’ që kërkohet prej jush nuk është mbyllja. Ajo çfarë kërkohet është vendosja e maskës, për të mbrojtur veten, për të mbrojtur të afërmit”, – tha Manastirliu.
Ministrja tha se po bëhet gati laboratori i dytë në QSUT për analizat për zbulimin e COVID-it.
“Falë punës që nuk është ndalur për as edhe një moment gjatë kësaj periudhe, sot ne kemi më shumë se 500 shtretër të gatshëm posaçërisht për pacientët e prekur nga Covid19. Kemi rritur kapacitetet me respiratorë, monitorë dhe pajisje mjekësore të nevojshme në të gjithë sistemin spitalor. Kemi shtuar kapacitetet e testimit. Sot kemi në dispozicion 90 mijë teste dhe po hapim dhe një laborator të dytë në QSUT”, tha Manastirliu.
