Shqipëria vazhdon të rrëmbejë vëmendjen ndërkombëtare!
Gjiri i Gramës, një nga perlat e fshehta të Rivierës Shqiptare, është renditur në vendin e 12-të në listën “50 Plazhet më të Mira të Europës për vitin 2025”, duke e futur Shqipërinë në hartën e destinacioneve më të lakmuara bregdetare të kontinentit.
Lista për vitin 2025 përfshin plazhe të zgjedhura nga e gjithë Europa, nga peizazhet dramatike të Islandës, deri te brigjet e paprekura të Mesdheut. Në këtë mozaik unik, Gjiri i Gramës bie në sy për ujin kristal, qetësinë absolute dhe natyrën e paprekur që e rrethon. Ai konsiderohet si një nga vendet më të izoluara ku udhëtarët mund të përjetojnë një lidhje të drejtpërdrejtë me natyrën.
Sipas organizatorëve të listës, ky klasifikim synon të inspirojë ata që janë në kërkim të pushimeve të paharrueshme pranë detit, larg turizmit masiv dhe ndërhyrjeve artificiale.
Renditja e Gjirit të Gramës në këtë listë prestigjioze është një dëshmi e mëtejshme e vlerave natyrore që Shqipëria ofron, një sekret i bukur që tashmë po zbulohet edhe nga bota.
