Historia e Kristinës, e cila prej dy vitesh luftoi me sëmundjen e rëndë, nisi kur ishte në vitin e parë në gjimnaz. Fillimisht mjekët e diagnostikuan me tumor në këmbën e majtë dhe për t’i shpëtuar jetën u detyruan që t’i prisnin këmbën.
Pas këtij operacioni doktorët kishin zbuluar disa njolla në mushkri, për të cilin iu nënshtrua një operacioni tjetër, që përfundoi me sukses.
Beteja e saj u bë publike gjatë emisionit “Dua të të bëj të lumtur”, ku Kristina ishte ftuar nga shoqëria e saj e gjimnazit, me dëshirën për t’i bërë një surprizë.
“Kam menduar shumë pas operacionit të parë dhe shpesh herë thosha me vete se ‘Pse nuk vdiqa, pse vazhdoj të jetoj?’. Por tashmë kam kuptuar që jeta është e bukur dhe kur ke forcë dhe dëshirë për të jetuar, ti mund të kalosh çdo vështirësi”, rrëfeu ajo.
Për ta lumturuar Kristinën ishte ftuar këngëtarja Fifi:
“Edhe unë kam kaluar plot vështirësi në jetën time, por jo si ti. Ne jemi shumë të forta dhe tepër të guximshme dhe nëse unë të duhem për ndonjë gjë do të jem aty për ty”.
