Dimri erdhi zyrtarisht, ndaj tani që pjesën më të madhe të kohës e kalojmë në shtëpi, është momenti ideal për romanca klasike dhe histori dashurie!
Historia që do të sjellim sot është ajo e kapitenit Ross Poldark, i cili vjen nga një familje me emër në Cornwall, Mbretëri e Bashkuar. Biznesi i tij familjar i minierave është shkatërruar pas vdekjes së babait, i cili i ka lënë dhe një numër të madh borxhesh.
Pasi Ross (Aidan Turner) kthehet nga lufta, pret që të gjejë krahëhapur të dashurën e tij Elizabeth (Heida Reed), të cilës i ka premtuar dashuri të përjetshme. Por kur arrin në shtëpi, të gjithë mendonin se ai kishte vdekur, dhe sikur të mos mjaftonte kjo, Elizabeth është fejuar me kushëririn e tij Francis (Kyle Soller).
Ashtu zemërthyer, Ross merr përsipër misionin për ta rindërtuar i vetëm minierën e të atit, në një kohë që i duhet të përballojë dhimbjen e madhe të një dashurie të humbur.
Dhe sigurisht këtë nuk mund ta bëjë i vetëm! Ross gjen një shërbëtore për ta ndihmuar me shtëpinë dhe kuzhinën, Demelza-n (Eleanor Tomlinson), një kokëkuqe bukuroshe, të cilën Ross e ngatërroi për djalë dhe e shpëtoi nga një sherr në rrugë duke i ofruar një strehë dhe punë.
Ross është një mashkull tepër punëtor, i ndihmon shpesh të papunët dhe lufton për drejtësi. Dhe pranë një mashkulli hero si kapiteni Poldark, duhet të jetë një femër e gatshme për të pushtuar botën me të. Këtu hyn Demelza, e cila do të bënte çfarëdo vetëm për t’i ardhur atij në ndihmë!
Mund të shërosh një zemër të thyer nga dashuria?!
Dashuria për Elizabeth e përndjek ngado kapitenin Poldark! Xhelozia e kushëririt Fransis për ndjenjat që dikur Ross dhe Elizabeth kanë pasur për njëri-tjetrin, do ta bëjë hakmarrës dhe do t’i mbyllë shumë dyer heroit tonë kryesor!
Elizabeth ndjen ende për Ross-in dhe bëhet xheloze kur sheh që ai merr në shtëpi një vajzë si Demelza! Jo sepse mendon se ajo është më e bukur (që unë mendoj se është), por sepse e sheh me habi faktin që ajo është në një rang shumë më të ulët se vetja dhe sërish ka mundësinë të ndajë çdo gjë me Ross-in, madje dhe zemrën!
Dhe Eliabeth ka të drejtë, Demelza bie në dashuri me kapitenin Poldark, ish-ushtarakun seksi që i dha një strehë për të futur kokën, i fali shoqërinë e tij dhe e trajtoi atë si pjesëtare të familjes, në një kohë që familja e saj e trajtonte shumë keq.
Por a do arrijë ajo të bëjë për veten kapitenin Poldark! A mundet një shërbyese të zërë vend në zemrën e thyer, në të cilën ai ende ruan Elizabeth?!
Të gjithë i duan femrat e forta!
Femrat në këtë serial, që është bazuar në librin me të njëjtin titull të Winston Graham, kanë karaktere shumë të forta.
Nga Demelza që e shohim të rritet në karakter, nga një shërbyese në një zonjë shtëpie (ups SPOILER) te Caroline (Gabriella Wilde), vajza e përkëdhelur që gëzon pasurinë e xhaxhait, por që nuk i hyn në punë kur dashurohet me mjekun Dwight Enys (Luke Norris), askush nuk mund të nënvlerësohet.
Ah po, seriali “Poldark” nuk tregon vetëm historinë e dashurisë së kapitenit Ross, por edhe të shumë personazheve të tjera që do të shfaqen në të 5-ta sezonet!
I xhiruar në vendet më mahnitëse!
E gjithë drama zhvillohet në Cornwall në Mbretërinë e Bashkuar dhe skenari është i mrekullueshëm. Mjaft skena janë xhiruar në Frome, Somerset dhe Corsham në Wiltshire, ndërsa skenat brenda janë xhiruar në Prior Park College në Bath.
Të shohësh Ross-in ose Demelza-n teksa shëtisin mbi një kalë me një sfond mahnitës, të kujton se pa marrë parasysh se çfarë po ndodh, disa gjëra mbeten të bukura dhe të paprekura nga problemet e njeriut.
Dhe Aidan, ehh thjesht perfekt!
Portretizimi i Ross Poldark nga Aidan Turner ka thyer zemrat e femrave dhe meshkujve në të gjithë botën. Nuk ka rëndësi nëse ai rrezikon jetën për të shpëtuar miqtë e tij, apo kosit barin pa këmishën veshur, në çdo rast kapiteni Poldark është ai mashkulli super tërheqës!
Ah po se mos harrojmë! Skenat e seksit janë gjithashtu një pjesë interesante e serialit! Dyluftime, kapitenë anijesh, protesta, dashuri të ndaluara, prostituta etj, të gjitha këto janë pjesë e kohës!
Shekulli i 18 ka qenë një çmenduri o njerëz!
