Adele ndau në gjysmë trofeun e saj për ta ndarë me Beyonce, pasi mori çmimin “Albumi i Vitit” në ceremoninë e 59-të të “Grammy Awards”, sepse ajo ndihej sikur nuk e meritonte.
Këngëtarja e “Hello”, e cila ishte fituesja e natës pasi mori 5 çmime, u shokua kur u shpall fituesja për çmimin e albumit “25”, ndërsa i kërkoi Beyonce që ta merrte gjysmën e trofeut në shtëpi për albumin e saj “Lemonade”. Në këtë mënyrë ajo theu trofeun qëllimisht në mënyrë që ta ndante këtë nderim me idhullin e saj.
Këngëtarja 28-vjeçare u përlot ndërsa pranoi çmimin më të kërkuar të natës. Ishte ky momenti kur Adele ia dedikoi fitoren e madhe këngëtares 35-vjeçare, ndërsa e lavdëroi yllin shtatzënë për albumin madhështor “Lemonade”.
“Nuk mundem ta pranoj këtë çmim dhe jam shumë e përulur dhe mirënjohëse, por artistja e jetës sime është Beyonce. Ky album për mua, “Lemonade” ishte kaq madhështor, i menduar kaq mirë, kaq i bukur dhe zbulon shpirtin. Mënyra se si më bëre mua dhe miqtë e mi të ndiheshin, mënyra se si bëre miqtë e mi me ngjyrë të ndiheshin ishte kaq fuqizuese. Të dua. Të kam dashur gjithmonë dhe do të dua gjithmonë”, tha gjatë fjalimit të saj Adele.
Ishte ky momenti që përloti këngëtaren 35-vjeçare Beyonce, e cila u emocionua gjatë fjalimit të Adele.
Kjo e fundit sqaroi më pas në konferencën për shtyp: “Siç thashë në fjalimin tim, albumi im i vitit është “Lemonade”. Kështu që një pjesë e imja vdiq përbrenda, si një fanse e Beyonce – nuk po gënjej. Votova për të. U ndjeva sikur ishte koha e saj për të fituar. Çfarë duhet të bëj ajo për të fituar “Albumin e Vitit”?”.
Mbrëmja e 12 shkurtit ishte nata e Adele, pasi ajo mori në shtëpi edhe çmimet: “Kënga e Vitit”, “Regjistrimi i Vitit”, “Performanca më e mirë pop solo”, “Albumi më i mirë pop” me “Hello”.
Burimi: Daily Mail
